Qırımtatar iş adamı ve hayriyecisi Resul Velilâyevnıñ, sözde saqlama muddeti bitken azıqlar içün yaqalanmasınıñ aqiqatta bir qaç sebebi olmaq mümkün. Olardan biri – «qırımtatar işine tazyiqtır». Bunı Qırım.Aqiqat Radiosı efirinde Qırımtatar resurs merkezi idaresiniñ başlığı, Qırımtatar Milliy Meclisiniñ azası Eskender Bariyev bildirdi.
«Birinci (sebep – QA) – daa bir qırımtatarlarnı qorquzuv teşebbüsidir. Biz yañı bir repressiyar dalğasına şaat oldıq. Ekinci maqsat – qırımtatar işine tazyiq. Neçün deseñiz, Resul Velilâyevniñ işi, yalıñız bütün Qırımğa yayılğan ticaret ağı ve biñlerce iş eri degil de, o, aynı zamanda öz işi içün «Krımopt»tan mal alğan biñlerce küçük ve orta iş adamları… Üçünci sebep – qırımtatar menligine darbe, çünki Resul hayriyeci sıfatında da faaliyet kösterip, Qırım ve qırımtatar tarihi, edebiyatı ve tilşınaslığı boyunca tetqiqatlarğa maliy yardım ete edi. Dörtünci sebep de, qırımtatar halqınıñ birdemligi, cöremeler tölevinde bir-birine qol tutması, siyasiy mabüslerniñ balaları ve ailelerine, yoqsullarğa yardım etmesi işğalci ukümetni asabiyleştire», – dedi Bariyev.
Aprel 26 sabasında Qarasuvbazarda «Güzel» ticaret ağı ve «KrımOpt» şirketinniñ tükânlarında Rusiye telükesizlik hadimleri tarafından tintüvler yapılğanı belli oldı.
Qırımtatar Milliy Meclisiniñ reisi Refat Çubarov qırımtatar iş adamları, hayriyeciler ve qırımtatar milliy areketiniñ iştirakçileri Ali Bariyev, Asan Bariyev, Remzi Velilâyev, Resül Velilâyev, Ekrem Velilâyev, Zera Velilâyeva ve olardan ayrı yaşağan yetişken balalarınıñ evlerine Rusiye telükesizlik hadirmleriniñ tintüvler ile kelgenini bildirdi.
Çubarovnıñ malümatına köre, Rusiye telükesizlik hadimleri Resul Velilâyev ve Ali Bariyevni Rusiye Tahqiqat komitetiniñ Qırım boyunca idaresine alıp kettiler. Olarnı üç saattan ziyade sorğulağan soñ Rusiye territoriyasına alıp kettiler.
«RİA Krım»nıñ bildirgenine köre, Rusiye Tahqiqat komitetiniñ Qırım boyunca idaresinde, «al-azırda adresleri boyunca tintüvler yapılğan iş adamları ya da şirketlerge qarşı idare tarafından alıp barılğan işler yoq», dediler. Rusiyedeki «Kommersant» neşiriniñ malümatına köre, tintüvni OMON uruşmacılarnıñ yardımı ile FSB hadimleri keçirdi.
«Güzel» ticaret ağı ve «KrımOpt» şirketi iri bir iş adamı ve hayriyeci Resül Velilâyevge aitler.
İlhaqtan soñ Qırımnı aqiqatta idare etken Rusiye ukümet organları muntazam surette mustaqil jurnalistler, vatandaş faaliyetçileri, Qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerini kütleviy şekilde tinteler.
