Qırımtatar Milliy Meclisi reisiniñ muavini Ahtem Çiygoz siyasiy mabüslerniñ ilhaq etilgen Qırımda yaşağan aqrabaları ile birlikte areket etüv içün mesüliyetli olaraq tayin etildi.
Bunı aprel 30-da özüniñ Facebooktaki saifesnde Qırımtatar Milliy Meclisiniñ reisi Refat Çubarov bildirdi.
Çubarov: «Qırımtatar Milliy Meclisinde, milletke baqmayıp, Qırım siyasiy mabüsleriniñ aqrabaları ve, ondan ğayrı, mahkemede imayeleri ile alâqalı bütün meseleler boyunca olarnıñ advokatları ile birlikte areket etüv Qırımtatar Milliy Meclisi reisiniñ muavini Ahtem Çiygozge avale etildi», – dep yazdı.
Daa evel Refat Çubarov, Aqmescitteki «Hizb ut-Tahrir işi» figurantı Uzeir Abdullayevniñ «ölüm telükesi altında» bulunğanını bildirgen edi. Lâkin Kyiv, Aqmescit ve Moskvada türlü insanlar tarafından yapılğan areketler sayesinde «Uzeir içün ölüm telükesi keçti, ve şimdi o, ekimlerniñ kontroli altında buluna», dep qayd etti Meclis başlığı.
Rusiye advokatı Nikolay Polozov, Rusiye prezidenti yanındaki İnsan aqları boyunca şura (İAŞ) ve Rusiye ombudsmeni Tatyana Moskalkovadan Abdullayev etrafındaki vaziyetke qarşılıq köstermekni rica etti.
