Qırımtatar Milliy Meclisiniñ reisi Refat Çubarov, «şimdi Moskvada tutulğan şahıslarğa dair yüregi yaman bir şey olacağını duya», dep bildirdi. Bunı o, aprel 29-da «112 Ukraina» telekanalınıñ efirinde aprel 26-da Qarasuvbazardaki tintüvlerden soñ yaqalanğan ve daa soñra Moskvağa alıp ketilgen iş adamları Resul Velilâyev ve Ali Bariyevniñ yaqalanmasını izalarken bildirdi.
Çubarov: «Teessüv ki, er şeyni aytıp olamayım. Men advokatlarnen alâqada bulunam, lâkin şimdi Moskvada tutulğan şahıslarğa dair yüregim yaman bir şey olacağını duya», – dedi.
Qırımtatar Milliy Meclisiniñ reisi Qarasuvbazardaki tintüvler ve tevqiflerniñ Qırımda Rusiye prezidenti saylavınıñ ötkerilmesi ile alâqalı olğanlarını ihtimallı saya.
Çubarov: «Qırımda mart 18-de keçken şu qanunsız saylavnıñ arfesinde FSB hadimleri bütün qırımtatar iş adamlarına kelip, olarda çalışqan insanlarınen, saylavğa kelsinler dep, suhbet keçirmelerini talap ettiler. Şu «KrımOpt» ağında 1000-den ziyade insan çalışa. Telükesizlik hadimleri olarnıñ teşkil olunğan tarzda saylavğa kelmelerini istedi, lâkin şirketniñ saipleri, bu er kişiniñ şahsiy işidir, dediler», – dep ikâye etti.
Aprel 26 sabasında Qarasuvbazarda «Güzel» ticaret ağı ve «KrımOpt» şirketinniñ tükânlarında Rusiye telükesizlik hadimleri tarafından tintüvler yapılğanı belli oldı.
Çubarov qırımtatar iş adamları, hayriyeciler ve qırımtatar milliy areketiniñ iştirakçileri Ali Bariyev, Asan Bariyev, Remzi Velilâyev, Resül Velilâyev, Ekrem Velilâyev, Zera Velilâyeva ve olardan ayrı yaşağan yetişken balalarınıñ evlerine Rusiye telükesizlik hadirmleriniñ tintüvler ile kelgenini bildirdi.
Çubarovnıñ malümatına köre, Rusiye telükesizlik hadimleri Resul Velilâyev ve Ali Bariyevni Rusiye Tahqiqat komitetiniñ Qırım boyunca idaresine alıp kettiler. Olarnı üç saattan ziyade sorğulağan soñ Rusiye territoriyasına alıp kettiler.
«RİA Krım»nıñ bildirgenine köre, Rusiye Tahqiqat komitetiniñ Qırım boyunca idaresinde, «al-azırda adresleri boyunca tintüvler yapılğan iş adamları ya da şirketlerge qarşı idare tarafından alıp barılğan işler yoq», dediler. Rusiyedeki «Kommersant» neşiriniñ malümatına köre, tintüvni OMON uruşmacılarnıñ yardımı ile FSB hadimleri keçirdi.
«Güzel» ticaret ağı ve «KrımOpt» şirketi iri bir iş adamı ve hayriyeci Resül Velilâyevge aitler.
İlhaqtan soñ Qırımnı kerçekten idare etken Rusiye ukümet organları muntazam surette mustaqil jurnalistler, vatandaş faaliyetçileri, Qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerini kütleviy şekilde tinteler.
