Halqara uquqnı bozıp ilhaq etilgen Qırım sakinlerini askerlikke çağırğan Rusiyege tazyiq etmekni yalıñız halqara sanktsiyalar yardımınen yapmaq mümkün. Bu fikirni Qırım.Aqiqat Radiosınıñ efirinde Ukrainadaki «Regional insan aqları merkezi»niñ adliyecisi Vitaliy Nabuhotnıy ifade etti.
Aynı zamanda o, Ukraina dünya toplulığını Qırımdaki askerlikke çağıruv kampaniyalarından haberdar etmek kerek, dep qayd etti.
Vitaliy Nabuhotnıy: «Bugün diger halqara mehanizmler, şu cümleden BMT Telükesizlik Şurasınıñ amelde qullanılması içün imkânlar yoq, çünki Rusiye Telükesizlik Şurasınıñ azası ola ve onda veto aqqı bar. BMT Telükesizlik Şurası islâh etilmegence onıñ mehanizmlerini qullanmaq pek qıyın olacaq. Bu sebepten – sanktsiyalar, dünya toplulığını (Qırımda – QA) deşetli şeyler olıp keçkeninde qandıruv, olarnı vesiqalaştıruv, halqara arenada qullanuv», – dedi.
Ukrainadaki «Regional insan aqları merkezi»niñ adliyecisi Vitaliy Nabuhotnıy ile intervyüni Qırım.Aqiqat saytında yaqın künlerde oquñız.
Ukraina Rusiyeden, ilhaq etilgen Qırım sakinleriniñ arbiy quvetlerine askerlikke alınmasını toqtatmaqnı talap ete. Bunı BMT Telükesizlik Şurasındaki gençlik, barışıq ve telükesizlik meseleleri boyunca açıq munaqaşalar esnasında Ukraina TİNi başlığınıñ muavini Serhiy Kıslıtsâ bildirdi.
Kremlniñ kontroli altında olğan Qırım ukümetiniñ malümatına köre, 2018 senesinde Rusiye ordusına eki biñden ziyade Qırım sakinini askerlikke çağırmaq niyetindeler. Öz nevbetinde Qırım Muhtar Cumhuriyeti prokuraturası yarımada sakinlerinden, Rusiye ordusında hizmet etmek içün celpnameler alğanları aqqında Ukraina uquqqoruyıcı organlarına haber etmege rica ete ve Rusiyeniñ areketlerini qanunsız dey.
BMTniñ Ukrainada insan aqları boyunca monitoring missiyası, 2017 senesinde eñ az 4800 Qırım sakininiñ Rusiye silâlı quvetlerine askerlikke çağırıldı, dep bildirgen edi.
