İlhaq etilgen Qırımdaki Rusiye ukümeti 2018 senesinde Rusiye ordusına 2300 Qırım sakinini çağırmaq istey. Bunı aprel 3-te, yarımadanıñ baş naziri muavini İgor Mihayliçenkonıñ sözlerine atıfta bulunıp, Qırımdaki Rusiye akimiyetiniñ saytı bildire.
Qırım «Rusiye Silâlı Quvetleriniñ saflarına vatandaşlarnı çağıruv boyunca vazifelerniñ sayısı boyunca Rusiyedeki Cenübiy arbiy okrugınıñ 15 subyekti arasında dörtünci oldı», dep qayd etti o.
Qırım ukümetiniñ matbuat hizmeti: «Bu munasebet ile cumhuriyetniñ şeer ve rayon çağıruv komissiyaları tarafından esassız qararlarnıñ alınmasına yol bermemek kerek. Ondan ğayrı, vatandaşlarnıñ arbiy hizmetke yararlığı boyunca tibbiy teşkerüvler yapılğanda hatalar ve aqlarınıñ bozuluvına yol bermemek kerek», – dep, Mihayliçenkonıñ sözlerini naqil ete.
Qırım Muhtar Cumhuriyetiniñ Prokuraturası yarımadanıñ sakinlerine, Rusiye ordusında arbiy hizmet keçmek içün celpnameler alsalar, telefon ya da elektronik poçta vastasınen muracaat etmege rica ete.
BMTniñ Ukrainada insan aqları boyunca Monitoring missiyası, 2017 senesinde Rusiyeniñ silâlı quvetlerine arbiy hizmetke eñ az 4800 Qırım sakininiñ çağırılğanını bildirgen edi.
Aprel 2-de Ukrainanıñ qıtadaki qısmında, mayısnıñ soñuna qadar devam etecek muddetli arbiy hizmetke baar çağırıluvı başlandı.
