Aprel 27-de Qırımda faaliyetçiler ve Aqmescitteki «Hizb ut-Tahrir işi» figurantlarınıñ aqrabaları, bu iş boyunca yapılğan qapalı oturışuvğa şikâyet ettiler. Bunı Qırım.Aqiqat muhbiri bildire.
Faaliyetçi Remzi Bekirov: «Tahqiqat izolâtorında endi bir buçuq yıldan ziyade tutulğan yaqınlarımız ya da tanışlarımıznı körmek içün er sefer mahkemege kirecek olamız. Uzun vaqıttan berli bizni anda yibermeyler. Belki de bunı, olarnıñ (iş figurantlarınıñ) iradesini qırmaq ve malümat toplulıq içinde dağılmasın dep yapadırlar. Bu sebepten biz er sefer mahkemege şikâyetler yazamız», – dep añlattı.
Şikâyetlerde faaliyetçiler, «milliy ya da diniy alâmetlerge köre» oturışuvğa yiberilmegenlerine işaret eteler. Şikâyetler Kremlniñ kontroli altında olğan Qırım Yuqarı mahkemesiniñ reisi İgor Radionovnıñ adına berile.
Aqmescitteki «Hizb ut-Tahrir işi» figurantlarına sıñırlav tedbiriniñ uzatılmasına qarşı apellâtsiyanı akem Aleksey Posledov baqa.
2016 senesi oktâbrniñ 12-sinde Qırımda beş musulman qorantasında tintüvler yapıldı. Tintüvler neticesinde, Rusiyede yasaq etilgen «Hizb ut-Tahrir» teşkilâtında iştirak etkenlerinde qabaatlanğan beş qırımtatar: Rustem İsmailov, Uzair Abdullayev, Teymur Abdullayev, Emil Cemadenov ve Ayder Saledinov tevqif etildi.
«Hizb ut-Tahrir» halqara siyasiy İslâm teşkilâtınıñ vekilleri öz vazifesini, bütün musulman devletleriniñ bir İslam hilâfeti içinde birleştirilmesinde köreler. Lâkin olar buña irişmek içün terroristik usullarnıñ qullanılmasını red ete ve Rusiyede aqsız yerde taqip etilgenlerini aytalar. Rusiyeniñ Yuqarı mahkemesi 2003 senesinde «Hizb ut-Tahrir»ni yasaq etip, «terroristik» tanılğan 15 birleşmeniñ cedveline kirsetti.
«Hizb ut-Tahrir işi» boyunca tevqif ve mahküm etilgen Qırım sakinleriniñ qorçalayıcıları, taqipniñ diniy alâmetine köre yapılğanını tüşüne. Advokatlar, Rusiye uquqqoruyıcı organları tarafından bu iş boyunca taqip etilgenler esasen qırımtatarlar ve olarnen birlikte İslâm dinini kütken ukrainler, ruslar, tacikler, azerbaycanlar ve diger etnik gruppalarğa ait Qırım sakinleri olğanını qayd eteler. Halqara uquq, işğal etilgen territoriyada işğal etken devletniñ qanunlarını tatbiq etmekni yasaq ete.
