2018 senesiniñ baardeki askerlikke çağırıluv kampaniyası esnasında qomşu Rusiye arbiy quvetleri saflarına ilhaq etilgen Qırımnıñ Qarasuvbazar rayonından 110 kişi çağırıldı. Olarnıñ 30%-ni teşkil etken uruşmacılar arbiy hizmetini yarımadanıñ tışında keçecekler. Bunı Qırım.Aqiqat muhbirine Qarasuvbazardaki Rusiye arbiy komissariatında bildirdiler.
2017 senesiniñ küzdeki askerlikke çağırıluvı esnasında da Qarasuvbazar rayonından Rusiyeniñ elit Arbiy desant, İçki işler nazirligi ordusı ve Milliy gvardiyada hizmet etmek içün 110 genç askerlikke çağırıldı.
İlhaq etilgen Qırımdaki Rusiyeniñ arbiy komissariatları, qomşu Rusiyeniñ arbiy oquv yurtlarına kirmek daveti ile teşviqat kampaniyasını keçireler.
Ukraina Rusiyeden, ilhaq etilgen Qırım sakinleriniñ arbiy quvetlerine askerlikke alınmasını toqtatmaqnı talap ete. Bunı BMT Telükesizlik Şurasındaki gençlik, barışıq ve telükesizlik meseleleri boyunca açıq munaqaşalar esnasında Ukraina TİNi başlığınıñ muavini Serhiy Kıslıtsâ bildirdi.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalarnı qullandı. Rusiye, yarımadanı işğal etkenini red etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevral 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti. 2015 senesi oktâbr 7-de Ukraina prezidenti Petro Poroşenko munasip qanunnı imzaladı.
