İlhaq etilgen Qırımda Rusiye arbiy komissariatları Rusiye arbiy oquv yurtlarına kirmek daveti ile teşviqat kampaniyasını başladı.
Bunı Qırım.Aqiqat muhbiri bildire.
Yarımadanıñ arbiy komissariatları, Rusiyedeki 39 arbiy oquv yurtunıñ Qırım sakinlerini oquvğa almaq azır olğanını bildireler. Bu cedveldge arbiy oquv yurtlar, institutlar ve akademiyalar kire.
Bunıñnen birlikte, Râzan aliy ava desantı komandanları oquv yurtu, Qırım sakinleri içün reklamalarda teklif etilgen arbiy oquv muessiseleri arasında brinci yerde tura.
Aprel 20-de Qarasuvbazar rayonında keçken «yunarmeyets»ler («gençler ordusı azaları») yarışında Qarasuvbazar rayonınıñ arbiy komissarı Yuriy Kamışenko, ketken sayın daa çoq qız arbiy zenaat saylay, dep qayd etti.
Kremlniñ kontroli altında olğan Qırım ukümetiniñ malümatına köre, 2018 senesinde Rusiye ordusına eki biñden ziyade Qırım sakinini askerlikke çağırmaq niyetindeler. Öz nevbetinde Qırım Muhtar Cumhuriyeti prokuraturası yarımada sakinlerinden, Rusiye ordusında hizmet etmek içün celpnameler alğanları aqqında Ukraina uquqqoruyıcı organlarına haber etmege rica ete ve Rusiyeniñ areketlerini qanunsız dey.
BMTniñ Ukrainada insan aqları boyunca monitoring missiyası, 2017 senesinde eñ az 4800 Qırım sakininiñ Rusiye silâlı quvetlerine askerlikke çağırılğanını bildirgen edi.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalar qullandı. Rusiye, yarımadanı işğal etkenini red etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevral 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
