Qarasuvbazarda Rusiye telükesizlik hadimleri, qırımtatar iş adamı Resul Velilâyevge ait «KrımOpt» şirketiniñ ticariy bazası territoriyasında keçirlgen çoq saatlıq tintüv sebebinden blok etilgen insanlarnı yiberip başladılar.
Şirketniñ hadimleri Qırım.Aqiqat muhbirine, anbarnıñ territoriyasında yaqın vaqıtqa qadar memurlar, bölük mudirleri, ekspeditorlar ve şoförlar olaraq 20-30 kişiniñ bulunğanını bildirdiler.
Al-azırda olarnıñ episini, pasportlarındaki bilgilerini yazıp alıp, birer-birer yibereler. Olar episi yarın saba saat 11-de bazanıñ territoriyasına kelmek mecbur.
Anbarnıñ territoriyasında qalacaq hadimler, odalardan bütün vesiqalarnıñ çıqarılğanını, yük maşinalarınıñ cöreme meydançığına alıp ketilgenini bildirdiler.
Aprel 26 sabasında Qarasuvbazarda «Güzel» ticaret ağı ve «KrımOpt» şirketinniñ tükânlarında Rusiye telükesizlik hadimleri tarafından tintüvler yapılğanı belli oldı.
Çubarov Rusiye telükesizlik hadirmleriniñ qırımtatar iş adamları, hayriyeciler ve qırımtatar milliy areketiniñ iştirakçileri Ali Bariyev, Asan Bariyev, Remzi Velilâyev, Resül Velilâyev, Ekrem Velilâyev, Zera Velilâyeva ve olardan ayrı yaşağan yetişken balalarınıñ evlerine tintüvler ile kelgenini bildirdi.
Çubarovnıñ malümatına köre, Rusiye telükesizlik hadimleri Rusiye Tahqiqat komitetiniñ Qırım boyunca idaresine Resul Velilâyev ve Ali Bariyevni alıp kettiler. Aynı zamanda daa evel yaqalanğan Rustem Velilâyev (Resul Velilâyevniñ oğlu) ve Zera Velilâyeva (Resulniñ qız qardaaşı) azat etildiler.
«RİA Krım»nıñ bildirgenine köre, Rusiye Tahqiqat komitetiniñ Qırım boyunca idaresinde, «al-azırda adresleri boyunca tintüvler yapılğan iş adamları ya da şirketlerge qarşı idare tarafından alıp barılğan işler yoq», dediler. Rusiyedeki «Kommersant» neşiriniñ malümatına köre, tintüvni FSB hadimleri, OMON uruşmacılarnıñ yardımı ile keçirdiler.
«Güzel» ticaret ağı ve «KrımOpt» şirketi iri bir iş adamı ve hayriyeci Resül Velilâyevge aitler.
Qırım Rusiye tarafından ilhaq etilgen soñ mustaqil jurnalistler, vatandaş faaliyetçileri, qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqaları bar dep şübhe altında tutulğan Qırım musulmanlarınıñ evleri ketken sayın daa sıq olaraq kütleviy surette tintilmekteler.
