Aprel 25-te Kyivde, «Qırım evi»nde «Kyivdeki Qırım birdemligi» teşkilâtı Yaltadaki «Hizb ut-Tahrir işi»niñ muzakeresi keçe.
Teşkil eticileriniñ bildirgenine köre, Qırım faaliyetçileri ve aq-uquq qorçalayıcıları, ne içün Qırımda Kremlniñ kontroli altında olğan telükesizlik hadimleri qırımtatarlarnı yaqalay, olar böyle etip terrorizm ile küreşelermi yoqsa toplulıqnı qorquzmaq isteylermi, degen mevzularda laqırdı eteler.
Muzakerede işniñ figurantı Emir-Usein Kukunıñ apayı Meryem Kuku, Qırımtatar Milliy Meclisiniñ reisi Refat Çubarov, «Amnesty International Ukraina» halqara insan aqlarını qorçalav teşkilâtınıñ spikeri Mariya Guryeva ve Emir-Usein Kukunıñ advokatı Sergey Loktev iştirak eteler.
2016 senesiniñ fevral-aprel aylarında Yaltada Arsen Cepparov, Refat Alimov, Emir-Useyin Kuku, Muslim Aliyev, İnver Bekirov ve Vadim Siruk yaqalandılar. Olarnı Rusiyede yasaq etilgen «Hizb ut-Tahrir» İslâmiy siyasiy teşkilâtına alâqalı olğanlarında qabaatlaylar.
Rusiye arbiy mahkemesi Yaltadaki «Hizb ut-Tahrir işi»ni Aqmescitte keçken köçüci oturışuvlarında baqa edi. Ondan soñ tevqif etilgen Qırım sakinlerini Rostov-na-Donu şeerine yolladılar.
Yanvar 24-te Ukraina Tış işleri nazirligi Rusiyeden Yaltadaki «Hizb ut-Tahrir işi» figurantınıñ azat etilmesini talap etti.
«Hizb ut-Tahrir» halqara siyasiy İslâm teşkilâtınıñ vekilleri öz vazifesini, bütün musulman devletleriniñ bir İslam hilâfeti içinde birleştirilmesinde köreler. Lâkin olar buña irişmek içün terroristik usullarınıñ qullanılmasını red ete ve Rusiyede aqsız yerde taqip etilgenlerini aytalar. Rusiyeniñ Yuqarı mahkemesi 2003 senesinde «Hizb ut-Tahrir»ni yasaq etip, «terroristik» tanılğan 15 birleşmeniñ cedveline kirsetti.
«Hizb ut-Tahrir işi» boyunca tevqif ve mahküm etilgen Qırım sakinleriniñ qorçalayıcıları, taqipniñ diniy alâmetine köre yapılğanını tüşüne. Advokatlar, Rusiye uquqqoruyıcı organları tarafından bu iş boyunca taqip etilgenler esasen qırımtatarlar ve olarnen birlikte İslâm dinini kütken ukrainler, ruslar, tacikler, azerbaycanlar ve diger etnik gruppalarğa ait Qırım sakinleri olğanını qayd eteler. Halqara uquq, işğal etilgen territoriyada işğal etken devletniñ qanunlarını tatbiq etmekni yasaq ete.
