Şimaliy Kavkaz okrugınıñ arbiy mahkemesinde Yaltadaki «Hizb ut-Tahrir işi» boyunca aprel 25-te gizliligi alıp taşlanğan qabaatlav şaatını sorğuladılar. Onıñ, Qızıltaş (Krasnokamânka) mektebiniñ iqtisadiy işler mudiri Şamil İlyasov olğanı ortağa çıqtı. Bunı Qırım.Aqiqat muhbiri bildire.
Advokat Edem Semedlâyev: «Eñ başından şaatnıñ gizliligi ilân etilgen edi, lâkin men onıñ şahsiy bilgilerinden gizliliginiñ alıp taşlanmasına istep, muracaat ettim. Ondan soñ şaat ifadelerini açıqtan, şahsiyetini gizlemeyip bermege qarar berdi», – dep ikâye etti.
Mahkemede şaat, Yaltadaki «Hizb ut-Tahrir işi»niñ üç figurantı – İnver Bekirov, Refat Alimov ve Arsen Cepparovnı şahsen bilgenini ayttı.
Advokat: «O, İnver Bekirovnen beraber bir mektepte çalışqanlarını ayttı. Ondan ğayrı o, Refat Alimov ve Arsen Cepparovnı bile edi. İfadelerinde o, İnver Bekirovnıñ İslâmnı yahşı bilgenini ve köyniñ bir çoq sakininiñ oña diniy işler boyunca muracaat etkenini añlattı», – dep ikâye etti.
Semedlâyevniñ aytqanına köre, şaatnıñ mahkemede ve daa evel tahqiqatçığa bergen ifadeleri bir-birinden ğayet farqlı.
Advokat: «Onıñ tahqiqatçığa bergen ifadelerinde, İnver Bekrov «Hizb ut-Tahrir» teşkilâtına bağlı insan, denile. Bu ifadelerni o, evi tintilip, özü, sorğulanğan yeri olğan FSBge alıp ketilgen soñ bergen edi. Menim fikrimce o, böyle ifadelerni tazyiq altında berdi», – dep ilâve etti.
2016 senesiniñ fevral-aprel aylarında Yaltada Arsen Cepparov, Refat Alimov, Emir-Useyin Kuku, Muslim Aliyev, İnver Bekirov ve Vadim Siruk yaqalandılar. Olarnı Rusiyede yasaq etilgen «Hizb ut-Tahrir» İslâmiy siyasiy teşkilâtına alâqalı olğanlarında qabaatlaylar.
Rusiye arbiy mahkemesi Yaltadaki «Hizb ut-Tahrir işi»ni Aqmescitte keçken köçüci oturışuvlarında baqa edi. Ondan soñ tevqif etilgen Qırım sakinlerini Rostov-na-Donu şeerine yolladılar.
Yanvar 24-te Ukraina Tış işleri nazirligi Rusiyeden Yaltadaki «Hizb ut-Tahrir işi» figurantınıñ azat etilmesini talap etti.
«Hizb ut-Tahrir» halqara siyasiy İslâm teşkilâtınıñ vekilleri öz vazifesini, bütün musulman devletleriniñ bir İslam hilâfeti içinde birleştirilmesinde köreler. Lâkin olar buña irişmek içün terroristik usullarınıñ qullanılmasını red ete ve Rusiyede aqsız yerde taqip etilgenlerini aytalar. Rusiyeniñ Yuqarı mahkemesi 2003 senesinde «Hizb ut-Tahrir»ni yasaq etip, «terroristik» tanılğan 15 birleşmeniñ cedveline kirsetti.
«Hizb ut-Tahrir işi» boyunca tevqif ve mahküm etilgen Qırım sakinleriniñ qorçalayıcıları, taqipniñ diniy alâmetine köre yapılğanını tüşüne. Advokatlar, Rusiye uquqqoruyıcı organları tarafından bu iş boyunca taqip etilgenler esasen qırımtatarlar ve olarnen birlikte İslâm dinini kütken ukrainler, ruslar, tacikler, azerbaycanlar ve diger etnik gruppalarğa ait Qırım sakinleri olğanını qayd eteler. Halqara uquq, işğal etilgen territoriyada işğal etken devletniñ qanunlarını tatbiq etmekni yasaq ete.
