QMC Prokuraturası, aprel 23-te Qırım ile memuriy sıñırda yaqalanğan Rusiye prezidenti Vladimir Putinniñ ilhaq etilgen Qırım ve Aqyarda vekili hanımğa qarşı şübheli tanılğanı aqqında bildirüvni azırlay.
QMC Prokuraturasınıñ matbuat hizmetinde Qırım.Aqiqatqa: «Şübheli tanılğanı aqqında bildirüv azırlana ve tevqif etilüv şeklinde sıñırlav tedbiriniñ saylanması meselesi çezile», – dep tasdiqladılar.
Aprel 23 bazarertesi künü «Çoñğar» keçirüv noqtasında, ilhaq etilgen Qırım ve Aqyarda Rusiye prezidenti Vladimir Putinniñ vekili olğan Ukraina vatandaşı hanımnı yaqaladılar.
Prokuraturanıñ malümatına köre, yaqalanğan hanım 2018 senesi saylavında Putinniñ Rusiye prezedenti vazifesine namzet kösterilmesine qol tutmaq içün ilhaq etilgen Qırım ve Aqyarda qanunsız olaraq imzalar toplanmasını teşkil etti ve ötkerdi.
Onı, «Ukrainağa qarşı, onıñ suvereniteti, topraq bütünligi ve toqunılmazlığı zararına yapılğan bozucı areketlerniñ ötkerilmesinden» dolayı şübheli sayalar.
Muessisede yaqalanğan hanımnıñ adını bildirmeyler. Qırım.Aqiqat, bildirüvde «Ğalebe volontörları» Rusiye cemiyet areketiniñ Qırım şubesiniñ rehberi Yelena Odnovol aqqnda aytılğanını işançlı menbalardan ögrendi.
Aprel 3-te Ukraina Telükesizlik hizmetiniñ hadimleri Qırım ile memuriy sıñırda yarımadanıñ ilhaqına alâqası olğanından dolayı şübheli sayılğan, Rusiye tarafından ilhaq etilgen Qırımdaki Rusiyeniñ kontroli altında olğan Kezlev şeer şurasınıñ deputatı Sergey Osmininni yaqaladılar. Qırım deputatına 10 yıl muddetine qadar apishane cezası berilmek mümkün.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalarnı qullandı. Rusiye, yarımadanı işğal etkenini red etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevral 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
