Aprel 23 bazarertesi künü «Çoñğar» keçirüv noqtasında, ilhaq etilgen Qırımda ve Aqyarda Rusiye prezidenti Vladimir Putinniñ vekili olğan Ukraina vatandaşı hanımnı yaqaladılar. Bunı QMC Prokuraturasınıñ matbuat hizmeti bildire.
Bildirüvde: «Cinaiy işniñ alıp barılması çerçivesinde devletke hainlik yapıluv vaqiası boyunca Qırım Muhtar Cumhuriyeti prokuraturasınıñ protsessual rehberligi altında QMCdeki Ukraina Telükesizlik hizmetiniñ baş idaresi tarafından Ukraina Cinaiy-protsessual kodeksiniñ 208-nci maddesine muvafıq olaraq Rusiye Federatsiyası ve bunıñ kibi de «Ğalebe volontörları» ukümetten tış umum Rusiye teşkilâtınıñ menfaatları içün Rusiye Federatsiyası prezidenti vazifesine namzet olğan V.V. Putinniñ vekili sıfatında 2018 senesi saylavında V.V. Putinniñ Rusiye Federatsiyası prezedenti vazifesine namzet kösterilmesine qol tutmaq içün Qırım Muhtar Cumhuriyeti ve Aqyar şeeri territoriyasında qanunsız olaraq imzalar toplanmasını teşkil etken ve ötkergen Ukraina vatandaşı hanım yaqalandı», – denile.
Muessisede, Rusiyeniñ «Rusiye Federatsiyası prezidentiniñ saylavı aqqında» qanunına binaen prezident vazifesine namzet kösterilmek içün imzalarnı toplav, Rusiye prezidenti saylavınıñ ötkerilmesi içün resmiy ve mecburiy protsedura ola, dep qayd ettiler.
Bildirüvde: «Böylelikle, bu Ukraina vatandaşı hanım, Qırım Muhtar Cumhuriyeti ve Aqyar şeeriniñ vaqtınca işğal etilgen territoriyasında qanunsız olaraq Rusiye prezidenti saylavınıñ ötkerilmesine resmiy azırlanuv protsedurasında iştirak etip, Rusiye Federatsiyası ve «Ğalebe volontörları» ukümetten tış umum Rusiye teşkilâtına Ukrainağa qarşı, onıñ suvereniteti, topraq bütünligi ve toqunılmazlığı zararına yapılğan bozucı areketlerniñ ötkerilmesinde yardım etti», – denile.
Muessisede yaqalanğan hanımnıñ adını bildirmeyler. Qırım.Aqiqat, bildirüvde «Ğalebe volontörları» Rusiye cemiyet areketiniñ Qırım şubesiniñ rehberi Yelena Odnovol aqqnda aytılğanını işançlı menbalardan ögrendi.
Aprel 3-te Ukraina Telükesizlik hizmetiniñ hadimleri Qırım ile memuriy sıñırda yarımadanıñ ilhaqına alâqası olğanından dolayı şübheli sayılğan, Rusiye tarafından ilhaq etilgen Qırımdaki Rusiyeniñ kontroli altında olğan Kezlev şeer şurasınıñ deputatı Sergey Osmininni yaqaladılar. Qırım deputatına 10 yıl muddetine qadar apishane cezası berilmek mümkün.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalarnı qullandı. Rusiye, yarımadanı işğal etkenini red etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevral 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
