Kremlniñ kontroli altında olğan İslâm-Terek (Kirovskoye) mahkemesinde qırımtatar faaliyetçisi Giray Kulametovnıñ anası Zarema Kulametovağa qarşı uküm çıqardılar. Oña 250 saat mecburiy cemiyet işi ve zarar körgen polis hadimine kompensatsiya olaraq 20 biñ ruble (qararnen 10 biñ hrv – QA) miqdarında cöreme tayin etildi. Bunı Qırım.Aqiqat muhbiri bildire.
Sulh akemi Yana Gureyeva Kulametovanı Rusiye Cinaiy kodeksiniñ 319-ncı maddesi (ukümet vekiliniñ halq ögünde aqaretlev) boyunca qabaatlı tanıdı.
Qabaatlavnıñ versiyasına köre, qırımtatar faaliyetçisi Giray Kulametovnıñ anası Zarema Kulametova, oğlu yaqalanğan kününde polis hadimini aqaretledi ve, böylelikle, ayatı ve sağlığı içün telüke doğura edi. Tahqiqatnıñ versiyasına köre, aqaretlengen zarar körgen, Rusiye İİNiniñ İslâm-Terek rayonı boyunca polis rehberiniñ muavini Andrey Rogojin edi.
2018 senesi fevraliniñ başında Zarema Kulametovanı, polis hadimine «aqaret etken» içün polis bölügine çağırdılar.
Yanvar 18-de Kremlniñ kontroli altında olğan İslâm-Terek rayon mahkemesi, yanvar 18-de Eski Qırımda evi tintilgen soñ yaqalanğan qırımtatar faaliyetçisi Giray Kulametovnıñ işini baqıp çıqtı. Kulametovnı «ekstremistik artibutika ya da simvolikanıñ propagandası»nda qabaatladılar.
Yanvar 28-de qırımtatar faaliyetçisi Giray Kulametov, 2012 senesinde içtimaiy ağda videorolik derc etken içün alğan on künlük apis muddetinden soñ Qarasuvbazardaki muvaqqat tutuluv izolâtorından çıqtı.
İlhaqtan soñ Qırımda mustaqil jurnalistler, cemiyet faaliyetçileri, qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalarından dolayı şübheli tanılğan Qırım musulmanlarınıñ evleri ketken sayın daa sıq kütleviy surette tintile.
