Büyük Britaniyanıñ tış işleri naziri Boris Conson, Ukrainadaki zenaatdaşı Pavlo Klimkin ile Torontoda körüşüvinden zevq alğanını bildirdi. Körüşüvde tış siyaseti muessiseleriniñ başlıqları Donbass ve Qırımdaki vaziyetni muzakere ettiler. Bunı Conson Twitterde bildirdi.
Conson: «Bügün Ukraina tış işleri naziri Pavlo Klimkinni körmek zevqına malik oldım. London ile Kyivniñ reformalar saasında emekdaşlığı ve Donbass ile Qırımdaki vaziyetke diqqat etüvni saqlap qalmaq kerekligi muzakere etildi», – dep yazdı.
Klimkin de, Torontodaki körüşüvden memnun qalıp, oña «dostane suhbet» dedi.
Ukraina naziri «Yediler gruppası» TİN başlıqları ile muzakereleriniñ neticesi boyunca: «İşğal etilgen Qırım ve Donbassnı muzakere ettik. Ukrainanı serbest dünya, umumiy demokratik saanıñ ayırılmaz qısmı olaraq qabul eteler. Ortaqlarımız Ukrainağa qarşı ucümni, bu serbest, demokratik dünyağa qarşı ucüm olaraq köreler», – dep qayd etti.
Bundan evel Torontoda «Yediler gruppası» tış işleri nazirleriniñ körüşüvi keçti. Bu körüşüvge Ukraina tış işleri naziri Pavlo Klimkinni de davet ettiler.
Klimkinniñ bu körüşüvniñ arfesinde pressağa bildirgenine köre, o, ilhaq etilgen Qırımda mahküm etilgen, tahqiqat izolâtorında açlıq tutqan ukrain faaliyetçisi Volodımır Baluhnıñ taqdiri, Rusiye tarafından ilhaq etilgen Ukrainanıñ territoriyaları meselelerinde Ukraina ile birdemligini, Donbass içün barıştırıcı missiyasınıñ formatı, Ukrainanıñ reformalarına qol tutuv, Angliyadaki Solsberi şeerinde sabıq Rusiye istihbarat hadimi Sergey Skripalniñ zeerlenmesi ve Suriyedeki himiyeviy ucümden soñ peyda olğan yañı şaraitlerde Kyivniñ ğayretlerini «Yediler gruppası» devletleri ile koordinatsiya etüvini muzakere etmege planlaştıra edi.
«Yediler gruppası»na AQŞ, Yaponiya, Almaniya, Kanada, İtaliya, Fransa ve Büyük Britaniya kireler. 2018 senesinde klubda Kanada reislik yapa.
