Ukraina tış işleri naziri Pavlo Klimkin «Büyük yedilik» devletleriniñ tış işleri nazirleri ile Rusiyede Ukraina mabüsleriniñ ve şu cümleden ilhaq etilgen Qırımda qanunsız olaraq mahküm etilgen ukrain faaliyetçisi Volodımır Baluhnıñ azat etilmesini muzakere etecek.
Bunı nazir Twitterde yazdı.
«Endi Torontodam. «Büyük yedilik» devletlerinden tış işleri nazirleriniñ körüşüvinde Rusiyede qanunsız olaraq tutulğan Ukraina vatandaşları ve şu cümleden Volodımır Baluhnıñ işi aqqında laqırdı etecekmiz. İnsannı, Ukrainağa açıqtan qol tutqanı içün qoparmaq isteyler», – yazdı Klimkin.
Kremlniñ kontroli altında olğan Aqşeyh (Razdolnoye) rayon mahkemesi 2018 senesi yanvar 16-da arbiy yedeklerniñ saqlanmasında qabaatlanğan ukrain faaliyetçisi Volodımır Baluhqa qarşı üç yıl ve yedi ay koloniya-qasabada apis muddeti ile 10 biñ ruble (qararnen 4,6 biñ hrn.) miqdarında cöreme şeklinde cezalav ukmüni çıqardı ve oturışuv esnasında faaliyetçini tevqif etti.
Daa evel Rusiye prokurorı qabaatlanğan içün koloniya-qasabada cezasını ödemek şartı ile 5 yıl ve 1 ay azatlıqtan marum etilmesini ve 20 biñ ruble (9,2 biñ hrivna) miqdarında cöremeniñ tayin etilmesini istedi.
Baluh, yanvar 15 oturışuvındaki soñ sözü esnasında, oña qarşı işniñ «siyasiy baqışları ile alâqalı olaraq uydurılğanını» ve bu, onı «yañı Vatannı» sevmege mecbur etmeycegini söyledi.
Aqşeyh mahkemesi dekabr 1-de ukrain faaliyetçisine sıñırlav tedbirini eki ay muddetli ev apisine deñiştirdi.
Rusiye FSBsi Volodımır Baluhnı 2016 senesi dekabr 8-de yaqaladı. FSB hadimleri Volodımır Baluh yaşağan evniñ tavanında 90 patron ile bir qaç trotil şaşkasını taptılar, dep iddia ete ediler.
Baluhnıñ qorçalavı ve aq-uquq qorçalayıcıları, onıñ Ukraina vatanperveri olğanı sebebinden – eviniñ azbarında Ukraina bayrağı olğanı içün repressiyalar qurbanı olğanını iddia eteler.
