Kremlniñ nezaretindeki Aqşeyh rayon mahkemesi yanvarniñ 16-nda, mermi saqlağanında qabaatlanğan ukrain faili Volodımır Baluhnı üç yıl ve yedi ayğa yaşav tarzı koloniyağa yollamağa ve 10 biñ ruble (tahminen 4,6 biñ grivna – QA) ile cezalmağa qarar aldı.
Bunı Qırım.Aqiqat muhbiri bildirdi.
Bundan evel rus prokurorı, mabusnı 5 yıl ve 1 ayğa azatlıqtan marum etip, yaşav tarzı koloniyağa yollamağa ve 20 biñ ruble (tahminen 9,2 biñ grivna – QA) ile cezalamağa talap etken edi.
Yanvarniñ 15-nde mahke toplaşuvında Baluh, soñ sözüni aytar eken, oña qarşı açılğan dava «onıñ siyasiy noqta-i nazarı sebebinden uydurılğanını» ayttı ve dedi ki, bu onı «yañı Vatanını» sevmege mecbur etmez.
FSB Vladimir Baluhnı 2016 senesi dekabrniñ 8-nde yaqalağan edi. FSB hadimleri Volodımır Baluhnıñ evinde çardaqta 90 patron ve bir-qaç TNT blokları tapılğanını beyan etti.
2017 senesi avgustta, mahkeme onı üç yıl ve yedi ayğa apiske oturtmağa ve on biñ ruble ile cezalamağa qarar alğan edi. İstinaf arizası baqılğan esnasta Baluhnıñ ükümi lâğu etildi. Dava tekrar baqılmasına yollanıldı.
Dekabrniñ 1-nde Aqşeyh rayon mahkemesi ukrain faili içün sıñırlama tedbirini eki ayğa ev apisine deñiştirgen edi.
Baluhnıñ imayesi tasdiqlay ki, o ukrain tarafdarı olğanı sebebinden – divarındaki yazı ve azbarında Ukraina bayrağı asılğanı içün – basqılarğa oğratıldı.
