Rusiye telükesizlik hadimleri yalıñız faaliyetçilerni degil, aynı zamanda olarğa qol tutmaq içün çıqqan Qırım sakinlerini taqip eteler, çünki birdemlikniñ bunıñ kibi kösterilüvi FSB ve İİN vekillerini siñirlendire, ve Qırım sakinlerinde böyle taqip elilmelerniñ qanuniyligine dair sualler doğura. Bunı Qırım.Aqiqat Radiosı efirinde ATR telekanalınıñ alıp barıcısı, «Qırım birdemligi» birleşmesiniñ iştirakçisi Seytumer Seytumerov bildirdi.
Seytumerov: «Telükesizlik hadimleri insanlarnıñ toplaşqanına pek açuvlana. Bu sebepten olarğa qarşı memuriy işler açıla, cöremeler tayin etileler. İnsanlar qol tutmaq içün kelmese, insan kerçekten de cinayetçidir, degen assotsiatsiya peyda olacaq. Lâkin evi tintilecek, özü tevqif etilecek olğan insanğa 200-300 kişi kelgende böyle sual peyda ola: «O qadar qol tutqan insan qaysı bir cinayetçige kelecek?» Bu sebepten, bu işlerniñ sahte olğanı aşkârdır», – dep añlattı.
Daa evel o, faaliyetçi ve vatandaş jurnalisti Nariman Memedeminovnıñ tevqif etilmesi ile bağlı vaziyetke, «Rusiye telükesizlik hadimleri tarafından yarımadada başqa fikirde olğanlarğa qarşı yapılğan küreşiniñ numünesidir», dedi.
ATR telekanalınıñ alıp barıcısı, qırımtatar faaliyetçisi, «Qırım birdemligi» birleşmesiniñ iştirakçisi Seytumer Seytumerov ile intervyüni Qırım.Aqiqat saytında yaqın künlerde oquñız.
Qırım Rusiye tarafından ilhaq etilgen soñ FSB yarımadada muntazam surette jurnalistler, faaliyetçiler ve cemiyet erbaplarına qarşı tintüvler ve sorğular teşkil ete. Aq-uquq qorçalayıcıları buña, başqa fikirde olğanlarğa qarşı küreş, dep qıymet keseler.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalar qullandı. Rusiye, yarımadanı işğal etkenini red etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevral 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
