Ukraina prezidenti Petro Poroşenko tarafından parlamentke berilgen 8297 nomeralı qanun leyhası ilhaq etilgen Qırım sakinleri içün Ukraina vatandaşlığından marum etilmesini temin etmey, lâkin işlep bitirilmesine muhtac. Bu fikirni aprel 21-de Qırım.Aqiqatqa Ukrainadaki İnsan aqları boyunca Helsinki birleşmesiniñ adliyecisi Darya Sviridova ifade etti.
Sviridova: «Bu qanun Qırım ile eñ az derecede bağlı. İlk nevbette o, işğal etilgen territoriyalar aqqındaki qanunda yer alğan uquqiy ükümni pekite. Oña köre, işğal etilgen territoriyada alınğan vatandaşlıq Ukrainada tanılmay ve Ukraina vatandaşlığınıñ ğayıp etilmesi içün sebep olmaz. Esası bu», – dedi.
Onıñ aytqanına köre, qanun leyhasında çetel devletleriniñ saylavlarında iştirak etüv içün vatandaşlıqnıñ ğayıp etilmesine dair qısım açıq bir şekilde yazılmadı.
Aq-uquq qorçalayıcısı: «Ekinci muzakerege qadar bazı ifadelerni doğrultmaq kerek. Teessüf ki, evelden halqqa añlatılmağan ve içinde yañlış ifadeler olğan bunıñ kibi teşebbüsler Rusiye propagandası içün manaçıqlar doğura. Metinniñ özü iç bir taqdirde facialı degil», – dep ilâve etti.
Petro Poroşenkonıñ 8297 nomeralı qanun leyhası Yuqarı Radada aprel 19-da qayd etilgen edi.
Ukraina prezidentiniñ QMCde daimiy temsilcisi Boris Babin Facebookta, «Ukraina vatandaşlığı aqqında» Ukraina qanunınıñ 19-ncı maddesi içün teklif etilgen deñişmeler, Ukraina vatandaşlığınıñ avtomatk şekilde ğayıp etilmesi içün sebep olmayıp, aksine, «Qırım Muhtar Cumhuriyeti ve Aqyar şeeriniñ vaqtınca işğal etilgen territoriyasında Rusiyeniñ işğalci memuriyeti tarafından uquqqa qarşı ve vicdansız areketlerniñ yapılması» taqdirde Ukraina vatandaşlığınıñ avtomatik şekilde ğayıp etilmesine yol bermey, dep añlattı.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalar qullandı. Rusiye, yarımadanı işğal etkenini red etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevral 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
