Qırımdaki Rusiye ukümeti tarafından Tuzla adasındaki meydanlığı 6530 kvadrat metr olğan territoriyanıñ Rusiyege berilmesi «qanunsız ve Ukrainanıñ Anayasası ve qanunları ve bunıñ kibi de halqara uquqqa zıt kele». Bunı aprel 19-da Ukrainanıñ Vaqtınca işğal etilgen territoriyalar ve devlet içinde mecburen köçken şahıslarnıñ meseleleri boyunca nazirligi bildire.
Bildirüvde: «Bütün halqara normalar ve vesiqalarğa köre, Qırım Ukrainanıñ ayırılmaz qısmı olıp qalmaqta. Aynı zamanda Ukraina Anayasasınıñ 73-nci maddesi, Ukrainanıñ territoriyasını deñiştirüv boyunca bütün meselelerniñ yalıñız umum Ukraina referendumı tarafından çezilgenini tayin ete», – denile.
Ukraina nazirligi Rusiyeniñ qanunsız areketlerini taqbih etti ve «bundan soñ Ukraina qanunlarınıñ anayasa-uquq normaları ve halqara uquqnıñ printsiplerine riayet etmemesine yol bermemek maqsadınen» dünya toplulığını, Tuzla adasınıñ bir qısmını Rusiyenıñ mülkiyetine berüv faktını tanımamağa davet etti.
Tuzla adasınıñ Rusiyege berilmesine dair qarar, aprel 17-de Qırımdaki Rusiye ukümetiniñ oturışuvında alınğan edi.
Tuzla beli bir vaqıtları Taman yarımadası ile bağlı edi, lâkin keçken asırnıñ 1920-nci yıllarında ondan Tuzla adası ayırıldı.
2003 senesinden başlap, Ukraina ile Rusiye arasında, rusiyelilerniñ Taman yarımadası tarafından dambanı qurmaları sebebinden başlağan çatışma neticesinde Ukrainada Tuzla, rejimli zona sayıla edi.
Tuzla etrafındaki çatışma, Ukraina ile Rusiye arasındaki munasebelterde bir buhran oldı. O, Tuzla adasınıñ aitligine dair davalar ve Rusiye tarafından Keriç boğazında adağa doğru dambanıñ qurulması sebebinden başlanğan edi. Bazı talilcilerniñ fikrine köre, dambanıñ qurulmasından maqsat, Keriç boğazı ve Azav deñiziniñ statusı meselesini çezmek içün Ukrainağa tazyiq etmek edi.
