Moskva faaliyetçileri aprel 18 aqşamında «Strategiya-18» ananeviy Qırım sakinlerine qol tutuv tedbiri ile soqaqlarğa çıqtılar. Bu sefer Rusiye paytahtınıñ sakinleri ukümetke ve vatandaşlarğa qırımtatar halqınıñ tarihındaki facialı künni hatırlatmağa qarar berdiler. Bunı Qırım.Aqiqatqa mitingniñ iştirakçisi Vera Lavreşina bildirdi.
Lavreşina: «1938 senesi aprel 17-de Aqmescitte NKVD apishanesinde qurşun cezaları icra etildi. Casuslıq ve milletçilik içün qırımtatarlarnıñ eñ yahşıları – milletniñ eñ parlaq vekilleri qurşunğa tizildi. Bu, qararnen yigirmi isim. Olarnıñ arasında jurnalistler, yazıcılar, Qurultaynıñ reisi, muzeyniñ mudiri yer ala ediler. Biz qırımlılarğa taziye bildiremiz», – dedi.
Ondan ğayrı faaliyetçiler, vatandaş jurnalisti olaraq çalışqan ve yarımadadaki tevqiflerni aydınlatqan, şimdi apis etilgen qırımtatar faaliyetçisi Nariman Memedeminovğa qol tutqanlarını bildirdiler.
Tedbirniñ iştirakçisi hanım: «Qırımda mustaqil jurnalistika böyle etip öldi. Biz Nikolay Semenanıñ işini de unutmaymız. Jurnalistlerni bir-biri artından tevqif eteler. Olarnıñ yerine ise blogerler kele», – dedi.
Faaliyetçiler Tverskaya soqağında: «Vatandaş jurnalisti Nariman Memedeminov, FSB tarafından pancalandı», «Qırımdan tatarlarnıñ hibrid şekilde sürgün etilmesi – cinayettir», «Nikolay Semena: söz serbestligine qarşı mahkeme qararı», «Qırımda telükesizlik hadimleriniñ qanunsız areketleri toqtatılsın» yazıları ile plakatlarnı açtılar.
Sankt-Peterburg ve Moskvadan olğan Rusiye faaliyetçileri, qırımtatarlarnıñ 1944 senesi mayıs 18-de sürgün etilüvi hatırasına «Strategiya-18» adlı muddetsiz tedbir içün birleştiler. Er aynıñ 18-nci kününde faaliyetçiler, ilhaq etilgen Qırımdaki vaziyet aqqında ikâye etmek ve Rusiye cemaatçılığına insan aq-uquqları ve ürriyetleriniñ bozuluvı vaqiaları aqqında haber bermek içün şeerniñ soqaqlarına çıqalar.
