Link açıqlığı

Saatnıñ esas haberi

Avakov: AQŞta Donbass ve Qırımnıñ qaytarılmasına dair «adım-adım plan»nı muzakere ettim


Arsen Avakov
Arsen Avakov

AQŞnı ziyaret etken Ukraina İİNi başlığı Arsen Avakov, AQŞ devlet kâtibiniñ Avropa ve Avrasiya meseleleri boyunca yardımcısı Uess Mitçell ile Kyivniñ, kontroli altında olmağan Donbass ve Qırım territoriyalarınıñ qaytarılması boyunca planlarını muzakere etti.

Avakov, Twitterdeki saifesinde: «AQŞ devlet kâtibiniñ Avropa ve Avrasiya meseleleri boyunca yardımcısı Uess Mitçell ile Donbass ve Qırımnıñ step by step strategiyası boyunca qaytarılması planını ve Ukrainada, teşkil etilgen cinayetçilik ve şu cümleden Rusiye cinayetçileri ile küreşüv boyunca umumiy halqara platformanıñ meydanğa ketirilmesini muzakere ettik», – dep yazdı.

Mitçell tarafından bu hususta açıq menbalarda berilgen izaatlar yoq.

2017 senesiniñ sentâbrinde Ukraina prezidenti Petro Poroşenko, BMTniñ azaları olğan ülkelerge, «Ukrainağa ait Qırımnıñ dostları halqara gruppası»nı meydanğa ketirmek teşebbüsi ile muracaat etti.

Daa soñra Poroşenkonıñ QMCdeki temsilcisi Boris Babin, yarımadanıñ deokkupatsiyasından soñ Ukraina ukümeti tarafından ömürge keçirilecek «adım-adım areketler planı»nı 2018 senesiniñ soñuna qadar taqdim etmek istegenini bildirdi.

Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalar qullandı. Rusiye, yarımadanı işğal etkenini red etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevral 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.

XS
SM
MD
LG