Ukraina prezidentiniñ Qırım Muhtar Cumhuriyetinde dayimiy temsilcisi Boris Babin, «küçlü bir arbiy quvet olmadan» ilhaq etilgen Qırımda işğalniñ alıp taşlanması imkânsızdır, saya. Bunı o, Liga.net neşiri içün bergen intervyüde bildirdi.
Babin: «Qırımnı nasıldır aq-uquq qorçalayıcı cemiyet ceryanınıñ çerçivesinde azat etmek mumkün olacağını tüşünmeyim. Qırımnı azat etmek içün, iç şübhesiz, bizim – em de vaziyetten dolayı degil de, samimiy olğan ittifaqdaşlarımız tarafından Rusiyege qarşı halqara siyasiy tazyiq kerek olacaq. Ekincisi, kimse arbiy terkibiy qısımnı lâğu etmedi – küçlü arbiy quvet olmadan işğalniñ alıp taşlanması imkânsız, bu boş bir hayaldır», – dedi.
Onıñ aytqanına köre, «bütün bular, – strategiya elementleridir; işğal alıp taşlanğan soñ territoriyalarnıñ reintegratsiyası strategiyasından farqlı olaraq, bu strategiya ömürge keçirilmegence, onıñ tafsilâtlarını bildirmek olmay».
Aynı zamanda Babin, Ukraina ukümetiniñ Qırımğa, «kimse zarar körmeden, iç bir lüstra sallanmadan» qaytmaq kerekligini qayd etti.
Poroşenkonıñ Qırımdaki daimiy temsilcisi, bu yılnıñ soñuna qadar yrımadanıñ işğali alıp taşlanğan soñ Ukraina ukümeti yapacaq «areketlerniñ adım-adım planı»nı taqdim etmek istegenini qayd etti.
Mart 27-de Babin, Kyivge, halqqa açıq olğan, bir qaç yıl devamında yapılacağı közde tutulğan yarımadanı reintegratsiya etüv strategiyası kerek, dedi.
Bundan daa evel Ukraina prezidenti Petro Poroşenko, Rusiye tarafından ilhaq etilgen Qırımnıñ sakinleri, «Ukraina prezidenti saylavlarında iştirak etmek kerek ve erte-keç iştirak etecekler», dep beyan etti.
2017 senesiniñ sentâbrinde Poroşenko, BMTniñ azaları olğan ülkelerge, «Ukrainağa ait Qırımnıñ dostları halqara gruppası»nı meydanğa ketirmek teşebbüsinen muracaat etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalar tatbiq etti. Rusiye, yarımadanı işğal etkenini red etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevral 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
