Telegramnı meydanğa ketirgen Pavel Durov, messencerniñ blok etilmesiniñ Rusiye içün menfiy neticeleri aqqında söyledi.
Onıñ aytqanına köre, şu cümleden, 15 million Rusiye sakininiñ ayat keyfiyeti fenalaşacaq, çünki VPNsiz Telegram tosat-tosat irişilmez ola bilecek. Ondan ğayrı, messencerniñ blok etilmesine rağmen, Rusiyede terroristik telüke evelki seviyede qalacaq, çünki ekstremistler başqa messencerlerde ya da VPN vastasınen şifrlengen alâqa kanallarını qullanmağa devam etecekler.
Ondan ğayrı Durov, Telegramnıñ yasaq etilmesi Rusiyeniñ milliy havfsızlığı seviyesini eksiltecek, dep saya. O, bunı, Rusiye sakinlerine ait şahsiy bilgilerden bir qısmınıñ, Rusiyege qarşı bitaraf olğan Telegram meydançığından çıqıp, AQŞ tarafından kontrol etilgen WhatsApp ya da Facebookqa keçecegi ile añlata.
«Biz blok etilüv aqqında qararnı qanunsız sayamız ve Rusiye sakinleriniñ yazışma gizliligine aqqını qorçalamağa devam etecekmiz», – dep qayd etti Durov.
Aprelniñ ortasında Moskvanıñ Taganskiy mahkemesi «Roskomnadzor»nıñ Rusiye ve ilhaq etilgen Qırımnıñ territoriyasında Telegramnıñ blok etilmesine dair davasını qanaatlendirdi. Messencer tarafından qullanılğan web-adresler yasaq etilgen saytlar cedveline kirsetildi. FSBniñ talaplarını yerine ketirmegeni, blok etilmesi içün sebep oldı: Rusiye telükesizlik hadimleri, ihtimallı terroristlerniñ yazışmalarını oqumaq içün Telegramdan şifrleme anahtarlarını almaq istey ediler.
Aprel 16-da qomşu Rusiye ve ilhaq etilgen Qırımda Telegram messencerine irişüvni blok etmege başladılar.
