Link açıqlığı

Saatnıñ esas haberi

Telegram messenceri Rusiye territoriyasında blok etildi. Böyle qararnı Moskvadaki Taganskiy rayon mahkemesiniñ akemi Yuliya Smolina çıqardı. Oturışuv aprel 13-te 20 daqqa devam etti.

Mahkemede Rusiye FSBsiniñ vekili Yuliya Kostina bulundı. Mart ayında Yuqarı mahkemede o, «informatsiya, yazışma sırı ile elektron mesajlar sırını teşkil etken malümat degildir», degen edi.

Telegramnıñ vekilleri oturışuvğa kelmedi.

Oturışuv esnasında akem Smolina, Telegram qorçalavı tarafından berilgen, işniñ baqılmasını soñuna qaldırmaq muracaatını red etti. Messencerniñ vekili Dmitriy Dinze onı mahkemege aprel 12-de, aqşamnıñ keç maalinde yolladı.

Daa evel Roskomnadzor (Alâqa, informatsion tehnologiyalar ve kütleviy kommunikatsiyalar saasında nezaret boyunca federal hizmet) mahkemege, FSBniñ istegi ile messencerni blok etilmek talabınen muracaat etti. Telegramnıñ rehberleri içün tayin etilgen muddet keçken aftada soñuna yetti. Muessise, qullanıcılarnıñ mesajlarını şifreleme anahtarlarını FSBge bermekni talap etti.

Telegram rehberleri, yazışmanıñ sırını kefalet etken Rusiye Anayasasına atıfta bulunıp, bu talapnıñ yerine ketirilmesini red ete. Ondan ğayrı, şirkette, bunı tehnikiy ceetten yapmaq mumkün olmağanını bildireler.

XS
SM
MD
LG