Aprel 13 cuma künü Kyivde Qırımdaki siyasiy mabüslerniñ qorantalarından olğan balalarğa qol tutmaq maqsadınen ötkerilgen «Yardım qolu» tedbirinde Rusiye tarafından ilhaq etilgen Qırımdaki siyasiy mabüslerniñ ailelerinden olğan 105 bala içün 100 biñden ziyade hrivna toplandı.
Bunı «Qırım ailesi» cemiyet teşkilâtınıñ rehberi Anife Kurtseitova özüniñ Facebooktaki saifesinde bildirdi.
Kurtseitova: «Bugün (aprel 13-te – QA) beşinci «Yardım qolu» hayriye tedbiri keçti. Biz, bir sanada acayip icracılarnı toplap, bu tedbirniñ çerçivesi içinde kontsert keçirmekni çoqtan berli umüt ete edik… Biz, birlikte, Qırımdaki siyasiy mabüslerniñ ailelerinden olğan 105 bala içün 107 biñ hrivna toplap oldıq», – dep yazdı.
Teşkil eticiniñ malümatına köre, toplanğan paranı Qırımdaki siyasiy mabüslerniñ ailelerine alıp berecekler.
Qırımdaki «Bizim balalar» hayriye fondunıñ malümatına köre, babaları siyasiy sebeplerden tevqif etilgen 100 Qırım balası, babalarınıñ vasiyliginden marum qaldılar.
Qırımtatar Milliy Meclisiniñ reisi Refat Çubarov, ilhaq etilgen Qırımda tutulğan siyasiy mabüslerniñ sayısı 60 kişiden ziyade oldı, dep bildirgen edi.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalarnı qullandı. Rusiye, yarımadanı işğal etkenini red etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevral 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
