İlhaq etilgen Qırımdaki siyasiy mahkümlerniñ sayısı 60 kişini keçti, dep bildirdi qırımtatar halqı Milliy Meclisiniñ reisi Refat Çubarov «5 kanal»ğa bergen intervyusında.
Onıñ sözlerine köre, Kreml nezaretindeki mahkemeler Qırımda para cöremesinen cezalağan qırımtatar faalleri bu cedvelge kirmemekte.
«Bizler Qırımda siyasiy mahküm, azatlıqtan marum etilgen ya da SİZOda demir çabaqlar artında yatqan, mahkeme qararı denilgen ükümi çıqarılğan, ya da mahkeme qararınen Qırımda areket etmesi sıñırlanğan, dep esaplağan insanlarnıñ sayısı 60 kişini keçti. Men, 2014 senesi fevralniñ 26-ndan başlap büyük miqdarda para cöremesi tölegen adamlarnı esapqa almayım, olar sayısı artıq bir qaç yüzni keçti. Babaları apishanede olğanı sebebinden, babasız qalğan balalarnıñ sayısı yüzden ziyade», – dep ayttı Refat Çubarov.
Qırım mahkemelerinde qararlar qabul etilgen soñ, artıq aman-aman on kişi qomşu Rusiyege keçirildi.
Yanvarniñ 5-şi Cuma künü saba, Qırımda nevbetteki tintüvler keçirilgeni aqqında belli oldı.
Qırım Rusiye nezaretine keçkenden soñ, FSB yarımadada muntazam surette insanlarnı tutıp ala, tintüvler keçire, mustaqil jurnalist, qırırmtatar faalleri, muallefet ve Ukraina tarafdarı olğan cemaat erbapları ve diniy azınlıqlarnı teşkil etkenlerni sorğulay. Uquq qorçalayıcılar rusiyeli küç hadimleriniñ işbu areketlerini siyasiy ceetke esaslı dep tanıy.
