Rusiyeniñ Rostov-na-Donu şeerinde bulunğan Şimaliy Kavkaz okrugınıñ arbiy mahkemesinde Yaltadaki «Hizb ut-Tahrir işi» boyunca oturışuvda aprel 13-te qabaatlav şaatınıñ sorğulanması devam etti.
«Qırım birdemligi» cemiyet birleşmesiniñ Facebookta bildirgenine köre, Qırım advokatları oturışuvda Aqmescitten videokonferentsiya alâqası vastasınen iştirak ettiler.
Oturışuvnıñ başında advokatlar ve qabaatlanğanlardan biri, gizli tutulğan şaatnıñ mahkeme zalında sorğulanmasına dair muracaat berdiler.
Advokat Edem Semedlâyev, «işniñ gizli tutulğan şaat Mehmetov boyunca materiallarda, onıñ içün havflı ola bilecek bir şey tapmağanını» qayd etti, ve prokurorğa şaatnıñ gizli tutulğanınıñ sebeplerini bildirmek ya da ondan gizliligini alıp taşlamaqnı rica etti. Advokat Cemil Temişev, «şaatnıñ şahsiyeti tahqiqat vaqtından berli belli, ve o, taqip etilmedi», dep qayd etti. Muracaat qısmen qanaatlendirildi. Şaatnıñ ayrı odada deñiştirilgen sesnen ifade bergeni aqqında bildirile. Aynı zamanda, «Qırım birdemligi»nde bildirilgenine köre, akem qorçalavnıñ bir çoq suallerini alıp taşlay edi.
2016 senesiniñ fevral-aprel aylarında Yaltada Arsen Cepparov, Refat Alimov, Emir-Useyin Kuku, Muslim Aliyev, İnver Bekirov ve Vadim Siruk yaqalandı. Olarnı Rusiyede yasaq etilgen «Hizb ut-Tahrir» İslâmiy siyasiy teşkilâtına alâqadar olğanlarında qabaatlaylar.
Rusiye arbiy mahkemesi Yaltadaki «Hizb ut-Tahrir işi»ni Aqmescitte keçken köçüci oturışuvlarında baqa edi. Ondan soñ tevqif etilgen Qırım sakinlerini Rostov-na-Donu şeerine yolladılar.
Yanvar 24-te Ukraina Tış işleri nazirligi Rusiyeden Yaltadaki «Hizb ut-Tahrir işi» figurantınıñ azat etilmesini talap etti.
«Hizb ut-Tahrir» halqara siyasiy İslâm teşkilâtınıñ vekilleri öz vazifesini, bütün musulman devletleriniñ bir İslam hilâfeti içinde birleştirilmesinde köreler. Lâkin olar buña irişmek içün terroristik usullarınıñ qullanılmasını red ete ve Rusiyede aqsız yerde taqip etilgenlerini aytalar. Rusiyeniñ Yuqarı mahkemesi 2003 senesinde «Hizb ut-Tahrir»ni yasaq etip, «terrorist» olaraq tanılğan 15 birleşmeniñ cedveline kirsetti.
«Hizb ut-Tahrir işi» boyunca tevqif ve mahküm etilgen Qırım sakinleriniñ qorçalayıcıları, taqipniñ diniy alâmetine köre yapılğanını tüşüne. Advokatlar, Rusiye uquqqoruyıcı organları tarafından bu iş boyunca taqip etilgenler esasen qırımtatarlar ve olarnen birlikte İslâm dinini kütken ukrainler, ruslar, tacikler, azerbaycanlar ve diger etnik gruppalarğa ait Qırım sakinleri olğanını qayd eteler. Halqara uquq, işğal etilgen territoriyada işğal etken devletniñ qanunlarını tatbiq etmekni yasaq ete.
