Ukraina ukümetine Rusiye ile Azav deñizi aqqında añlaşmanı ğayrıdan baqıp çıqmaq kerek, çünki o, Ukrainanı deñizniñ suv meydanından sıqıştırıp çıqarmağa tırışa. Bunı Ukrainanıñ siyasiy eksperti Vasiliy Laptiyçuk Qırım.Aqiqat Radiosı efirinde, qanun bozğan «Nord» Keriç gemisi boyunca devam etken davanı izalağanda bildirdi.
Ekspert: «Ukraina ile Rusiye arasındaki 2003 senesi 24 tarihlı añlaşma boyunca Azav deñizi, tarihiy iç suvları olaraq kösterildi, lâkin onıñ içinde kimge ne ait olğanı öyle de tayin etilmedi. Cenkten evel teñ şekilde uzaqta bulunuv printsipi boyunca Azav deñiziniñ 60%-i Ukrainağa ve 40%-i Rusiyege ait edi. Bu vaziyet Rusiyeniñ menfaatına uymağanı aşkârdır, ve o, Ukrainanı sıqıştırıp çıqarmağa tırışa. Bizge bu añlaşmanı denonsatsiya etmek, Azav deñizini halqara suvlar olaraq tanımaq ve Gamburgda, Deñiz uquqı boyunca halqara tribunalda qorçalav qıdırmaq eñ elverişli yoldır», – dep qayd etti.
Daa evel Herson şeer mahkemesi, Qırım Muhtar Cumhuriyeti prokuraturasınıñ muracaatını qanaatlendirip, «Nord» Keriç gemisiniñ kapitanı Vladimir Gorbenkoğa qarşı birinci talap ile tahqiqatçığa sorğuğa kelmek mecburiyetini tayin etti. Ondan ğayrı, oña 2018 senesiniñ iyünine qadar ilhaq etilgen Qırımğa kirmesi yasaq etildi. Vladimir Gorbenko, Ukrainanıñ vaqtınca işğal etilgen territoriyanı ziyaret etüv tertibini bozğanından şübheli sayıla. O, qabaatını inkâr ete.
Mart 25-te Ukrainanıñ Devlet sıñır hizmeti Azav deñiziniñ suv meydanında Rusiyeniñ bayrağı altında bulunğan balıqçı gemisini yaqaladı. QMC prokuraturası «Nord» gemisiniñ ilhaq etilgen Keriçteki Kyiv tarafından qapalğan limanından çıqması vaqiası boyunca cinaiy işniñ alıp barılmasını başladı. Mart 30-da Ukrainanıñ mahkemesi «Nord» gemisini tevqif etti.
