Martnıñ 25-nde Ukraina Sıñır hızmeti Azaq deñizinde Rusiye baqraqlı balıqçı gemisini yaqalağan. Teşkerüv neticesinde gemi Ukraina qanunlarını bozaraq, Qırımnı ziyaret etkeni belli ola. Bu aqta martnıñ 26-nda Qırım.Aqiqatqa Ukraina Devlet Sıñır hızmeti yolbaşçısınıñ muavini Oleg Slobodyan ikâye etip berdi.
«Teşkerüv esnasında gemi işğal etilgen Qırımğa baruv tertibini bozğanı tesbit etildi. Geminiñ qaydlimanı Keriç limanıdır. Gemide çalışqanlarnıñ epsinde Qırımda berilgen Rusiye pasportları denilgen uydurıq pasportlar bar eken. Gemi Berdânsk limanına yollandı ve şimdi teşkerüvden keçe», – dep qayd ete o.
Martnıñ 26-nda saba bir sıra Qırım KHV Ukraina sıñırcıları Keriçli «Nord» balıqçı gemisini yaqalağanları aqqında bir haber derc etken edi.
2014 senesi iyül ayından itibaren Ukraina ükümeti Rusiye ilhaq etken Qırımnıñ bütün limanlarını qapattı, yarımadanıñ limanları halqara gemicilik içün qapalı.
2017 senesi avgustnıñ 1 ile 2018 senesi yanvarnıñ 31 arasında Qırımnıñ qapalı limanını 591 gemi ziyaret etkendir.
