Qırım Muhtar Cumhuriyeti prokuraturası tevqif etilgen «Nord» adlı Keriç gemisiniñ kapitanı Vladimir Gorbenkoğa yañı bir şübhe ilân etti. Onı, «qanunsız olaraq balıq, ayvan ve diger suv avı çeşitlerini avlama» boyunca şübheli sayalar.
Prokuraturanıñ spikeri Tatyana Tihonçikniñ Qırım.Aqiqatqa bildirgenine köre, Gorbatenkoğa Ukraina Cinaiy kodeksiniñ 249-nci maddesiniñ 1-nci qısmı boyunca yañı bir şübhe bildirildi.
Ukraina qanunlarına köre, gemi kapitanına yüzden eki yüzge qadar vatandaşlarnıñ bergilerden azat olğan kelir minimumı miqdarında cöreme ya da üç yılğa qadar muddetke azatlıqnı sıñırlav şeklinde ceza tayin etile bile.
Nezaret etici muessisede, Hersonda kün devamında Gorbenko içün azatlıqnı sıñırlav tedbiriniñ saylanması boyunca mahkeme keçirilecek, dep bildirdiler.
Bundan daa evel prokuratura Gorbenkoğa «Ukrainanıñ vaqtınca işğal etilgen territoriyasına kiriş ve ondan çıqış tertipleriniñ bozuluvı» boyunca şübhe bildirdi. Aprel 6-da mahkeme onı eki ayğa tevqif etti. Aprel 10-da rein para tölengen soñ o, izolâtordan çıqtı.
Mart 25-te Ukrainanıñ Devlet sıñır hizmeti Azav deñiziniñ suv meydanında Rusiyeniñ bayrağı altında bulunğan balıqçı gemisini yaqaladı. QMC prokuraturası «Nord» gemisiniñ Kyiv tarafından qapalğan ilhaq etilgen Keriçteki limanından çıqması vaqiası boyunca cinaiy işniñ alıp barılmasını başladı. Mart 30-da Ukrainanıñ mahkemesi «Nord» gemisini tevqif etti.
Rusiye kütleviy haber vastalarınıñ malümatına köre, kapitan öz qabaatını inkâr ete ve Ukraina ile Rusiye arasındaki halqara añlaşmalar çerçivesinde areket etkenini iddia ete. Gemi eyetiniñ azalarına qarşı memuriy cöremeler tayin etildi.
2014 senesiniñ iyül ayındn başlap, Ukraina ukümeti Rusiye tarafından ilhaq etilgen Qırımdaki bütün limanlarınıñ faaliyetini resmen toqtattı. Yarımadanıñ limanları halqara gemicilik içün qapalıdırlar.
2017 senesi ağustos 1-den 2018 senesi yanvar 31-ge qadar Qırımnıñ qapalı limanlarına 591 qanun bozğan gemi kirdi.
