Ukraina prezidenti Petro Poroşenko, ilhaq etilgen Qırımda Rusiye prezidenti saylavını tanımağanı içün Almaniya kantsleri Angela Merkelge minnetdarlığını bildirdi.
Bunı o, özüniñ Twitterdeki saifesinde bildirdi.
Bildirüvde: «Qırım boyunca printsipial noqtai-nazarı – yarımadanıñ ilhaqı ve Qırım Muhtar Cumhuriyetinde Rusiye prezidentiniñ saylavı neticelerini tanımağanı içün Angela Merkel hanımefendige teşekkürler. Bu – Almaniyanıñ sesi quvetli bir terkibiy qısmı olğan, dünyanıñ sesidir», – denile.
Rusiye ukümeti mart 18-de ilhaq etilgen Qırımda Rusiye prezidenti saylavını keçirdi. Vladimir Putin altı yıllıq muddetke ğayrıdan saylandı.
Saylavnıñ arfesinde Almaniya Tış işleri nazirligi, Qırımnıñ Ukrainağa ait olğanını beyan etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalar tatbiq etti. Rusiye, yarımadanı işğal etkenini red etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevral 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
