Mahkemeden evelki tahqiqat esnasında Qırım Muhtar Cumhuriyeti prokuraturası Kremlniñ kontroli altında olğan Kezlev şeer şurasınıñ deputatı Sergey Osminkinniñ areketlerine berilgen haysiyetni deñiştirmek mumkün.
Bunı Qırım.Aqiqat Radiosı efirinde QMC prokuraturasındaki Cinaiy işniñ alıp barılması boyunca nezaret idaresiniñ rehberi İgor Ponoçovnıy bildirdi.
Ponoçovnıy: «Bu (anayasa qurumınıñ zornen deñiştirilmesi ya da devletteki akimiyetniñ zapt etilmesine doğrultılğan areketler – QA) soñ şekildeki haysiyet degil. Mahkemeden evelki tahqiqat esnasında onıñ (Osminkinniñ – QA) areketleri mahkemeden evelki tahqiqatnıñ bitirilmesinden evel soñ şekilde haysiyetlenecekler. Bu sebepten haysiyet daa deñişe bilir», – dedi.
O, al-azırda Ukraina Cinaiy kodeksine muvafıq olaraq Kezlev deputatına qarşı tayin etile bilecek eñ büyük ceza – 10 yığa qadar azatlıqtan marum etüv, dep tasdiqladı.
Ponoçovnıy: «Şimdi oña, 110-ncı maddesiniñ 2-nci qısmında qayd etilgen cinaytniñ işlemesinden dolayı şübhe bildirildi, oña azatlıqnı sıñırlav tedbiri tayin etildi, onıñ epizodını tahqiq etecekmiz», – dedi.
Aprel 3-te Ukraina Telükesizlik hizmetiniñ (SBU) hadimleri Kezlev şeer şurasınıñ deputatını yarımadanıñ ilhaqına alâqadar olması şübhesi ile yaqaladılar. Oña 10 yıl muddetine qadar ceza berile bile.
Mahsus hizmette, Kezlev deputatı 2014 senesiniñ martında sözde «Qırımnıñ özüni mudafaa»sınıñ faaliyetinde iştirak etti, dep iddia eteler. SBU, Qırımnıñ ilhaqı esnasında deputat «devlet ukümeti ve Ukrainanıñ yerli öz-özüni idare etüv organları bulunğan mimariy binalarnıñ zapt etilmesinde faal iştirak etti», dep yaza. Mahsus hizmetniñ malümatına köre, yaqalanğan şahıs 2014 senesiniñ sentâbrinde «Yedinaya Rossiya» («Birleşken Rusiye») fırqasından Kezlev şeer şurasına saylandı.
Aprel 5-te Herson şeer mahkemesi Sergey Osmininni eki ayğa tevqif etti. Oña azatlıqnı sıñırlav tedbirini saylağanda mahkeme binasında qavğa çıqtı. Qavğa esnasında belli olmağan şahıslarnıñ gruppası Qırım deputatını SBU hadimleriniñ qolundan çekip almaq istedi.
Kezlev deputatınıñ yaqalanması aqqında tafsilâtlarnı Qırım.Aqiqatnıñ materialında oquñız.
