Rusiye, Ukrainağa ait olğan Qırımnı ilhaq etip, Ukraina ile yaqan 407 eki taraflı ve 80 halqara añlaşmanı bozdı. Bunı Ukraina informatsion siyaset naziriniñ birinci muavini Emine Ceppar Lissabonda, aprel 5-te keçken «Qırımnıñ deokkupatsiyası: ne zaman ve nasıl?» halqara konferentsiyasında bildirdi.
Cepparnıñ sözüne köre, Qırımnı Rusiyeniñ uquqiy saasına integrirlemek maqsadınen biñlerce qanuniy ve qanunğa ilâve olğan aktlar ve şu cümleden 15 anayasa qanunı qabul etildi, bildire Ukraina TİNiniñ matbuat hizmeti.
Ceppar konferentsiyada: «Teessüf ki, Rusiyeniñ cinayetleri devam ete. Olarnıñ esaslarından: bütün urriyet şekilleriniñ azaltılması, Ukrainağa ait Qırımda qanuniy olmağan Rusiye prezidentiniñ saylavı, Ukrainağa qarşı propaganda yapmaq içün Ukrainanıñ tele ve radio sıqlıqlar resursınıñ qullanılması, yarımadanıñ arbiyleştirilmesi, Rusiyege ordusına askerlikke çağıruv, vatandaş edalisini deñiştirüv, Qırımtatar Milliy Meclisiniñ faaliyeti yasaq etüv», – dedi.
Onıñ fikrince, halqara adovkatçılıq «şimdilik Ukraina vatandaşlarına Qırımda yardım etmek içün yekâne yoldır. Onsız repressiyalarnıñ sayısı bundan bayağı büyük olacaq edi».
Ukraina TİNiniñ matbuat hizmeti bildirgeni kibi, konferentsiya, Ukraina prezidentiniñ teşebbüsinen meydanğa ketirilgen «Qırım deokkupatsiyasınıñ dostları» halqara platforması çerçivesinde Portugaliyadaki Ukraina elçiligi tarafından teşkil etildi.
Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalarnı tatbiq etti. Rusiye, yarımadanı işğal etkenini red etip, oña «tarihiy adaletniñ tiklenmesi», dey.Ukraina Yuqarı Radası 2014 senesi fevralniñ 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
