Lissabonda, aprel 5-te keçken «Qırımnıñ deokkupatsiyası: ne zaman ve nasıl?» halqara konferentsiyasında ilhaq etilgen Qırımda insan aqlarınıñ bozuluvı ve medeniy mirasnıñ saqlanması saalarındaki vaziyet muzakere etildi.
Ukraina TİNiniñ matbuat hizmetinde bildirilgenine köre, konferentsiyada «Qırımda işğalci ukümet tarafından sistematik surette insan aqlarınıñ bozuluvı, qırımtatar halqınıñ simvolı olğan Han sarayınıñ mahv etilüvi içün telükeni köstergen tafsilâtlı faktlar taqdim etildi».
Ukraina tış işleri naziriniñ muavini Serhiy Kıslıtsâ konferentsiyada: «Qırımnıñ işğalci ukümeti tarafından qorquzuv, fizikiy ve maneviy tazyiq endi 35-40 biñ Ukaina vatandaşını (ve şu cümleden 20 000-den ziyade qırımtatarnı) yarımadanı terk etmek ve Ukrainanıñ diger rayonlarında yerleşmek mecbur ettiler. Rusiye ukümeti bu usullarnı, er türlü cemiyet teşebbüsleri ve muhalefetni yoq etmek içün qullana. Bu siyesetniñ neticesinde, qararnen 60 Ukraina vatandaşı uydurılğan cinaiy işler boyunca Rusiyede ve Qırımnıñ vaqtınca işğal etilgen territoriyasında qanunsız tutula. Olarnıñ azat etilmesi, Ukraina ve dünya toplulığı içün esas prioritetlerden biri ola», – dedi.
Ukraina TİNiniñ matbuat hizmeti bildirgeni kibi, konferentsiya, Ukraina prezidentiniñ teşebbüsinen meydanğa ketirilgen «Qırım deokkupatsiyasınıñ dostları» halqara platforması çerçivesinde Portugaliyadaki Ukraina elçiligi tarafından teşkil etildi.
Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalarnı tatbiq etti. Rusiye, yarımadanı işğal etkenini red etip, oña «tarihiy adaletniñ tiklenmesi», dey.Ukraina Yuqarı Radası 2014 senesi fevralniñ 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
