Qırımda mahküm etilgen ukrain faaliyetçisi Volodımır Baluhnıñ advokatı Olga Dinze, apellâtsion şikâyeti baqılğan soñ konvoy, imayesi altında bulunğanını kötekledi, dep bildirdi. Bunı o, Kremlniñ kontroli altında olğan Aqşeyh (Razdolnoye) mahkemesindeki oturışuvdan soñ Qırım.Aqiqat içün bergen izaatında bildirdi.
Advokatnıñ malümatına köre, ondan ğayrı, tahqiqat izolâtorınıñ memuriyeti, açlıq ilân etkenine sıltap, Baluhqa suv berilmesini toqtattı. Dinze mahküm etilgen faaliyetçiniñ vaziyetine ağır, lâkin kritik degil, dep qıymet kese.
Rusiye telükesizlik hadimleri tarafından açıq menbalarda bu hususta izaat berilmedi.
Daa evel Aqşeyhteki mahkeme, Baluhnı qorçalağan advokatnıñ, oña cemiyet qorçalayıcısı olaraq arhiyepiskop Klimentni tayin etüv aqqında muracaatını qanaatlendirdi.
Mart 14-te Kremlniñ kontroli altında olğan Qırım Yuqarı mahkemesi ukrain faaliyetçisi Baluhqa dair qararnı deñiştirdi. Akem qabaatlavdan arbiy yedeklerniñ satın alması aqqında maddeni alıp taşladı. Faaliyetçige qarşı koloniya-qasabada 3 yıl ve 5 ay muddetine azatlıqtan marum etüv ve, ondan ğayrı, 10 biñ ruble (qararnen 4,6 biñ hrn.) miqdarında cöreme şeklinde uküm çıqarılğan edi.
Mart 19-da Baluhnıñ, çıqarılğan ukümge qarşı narazılıq köstererek açlıq başlağanı belli oldı.
Mart 28-de Ukraina Tış işleri nazirligi Baluhnıñ deral azat etilmesini talap etti. Ukraina ombudsmeni Lüdmila Denisova, açlıq tutqan faaliyetçige ekimlerni yibermek ricasınen Rusiyedeki zenaatdaşına muracaat etti.
Rusiye FSBsi Volodımır Baluhnı 2016 senesi dekabr 8-de yaqaladı. FSB hadimleri Volodımır Baluh yaşağan evniñ tavanında 90 patron ile bir qaç trotil şaşkasını taptılar, dep iddia ete ediler.
Baluhnıñ qorçalavı ve aq-uquq qorçalayıcıları, o, Ukraina tarafdarı olğanı içün – eviniñ azbarında Ukraina bayrağı olğanı içün repressiyalar qurbanı olğanını iddia eteler.
