Rusiye tarafından ilhaq etilgen Qırımda arbiy yedekler saqlağanında qabaatlanğan ukrain faaliyetçisi Volodımır Baluh muddetsiz açlıq ilân etti.
Mart 19-da Qırım aq-uquq qorçalayıcıları gruppasınıñ bildirgenine köre, ukrain faaliyetçisi böyle etip mahkeme qararına qarşı narazılıq bildire.
Mart 14-te Kremlniñ kontroli altında olğan Qırım Yuqarı mahkemesi ukrain faaliyetçisi Baluhqa dair qararnı deñiştirdi. Akem Timur Slezko qabaatlavdan arbiy yedeklerniñ satın alması aqqında maddeni alıp taşladı. Bu munasebet ile qararnı 3 yıl ve 5 ay koloniya-qasabada apis muddetine deñiştirdiler.
2018 senesiniñ yanvarinde Kremlniñ kontroli altında olğan Aqşeyh (Razdolnoye) rayon mahkemesi Baluhqa qarşı üç yıl ve yedi ay koloniya-qasabada apis muddeti ile 10 biñ ruble (qararnen 4,6 biñ hrn.) miqdarında cöreme şeklinde cezalav qararını çıqardı.
Rusiye FSBsi Volodımır Baluhnı 2016 senesi dekabr 8-de yaqaladı. FSB hadimleri Volodımır Baluh yaşağan evniñ tavanında 90 patron ve bir qaç tane trotil şaşkasını taptılar, dep iddia ete ediler.
2017 senesiniñ ağustosında mahkeme ukrain faaliyetçisine qarşı üç yıl ve yedi ay koloniya-qasabada apis muddeti ile on biñ ruble miqdarında cöreme şeklinde üküm çıqardı. İstinaf şikâyeti baqılğanda Baluhqa qarşı çıqarılğan mahkeme qararı lâğu etildi. İş ğayrıdan baqılması içün yollanıldı.
Dekabr 1-de Aqşeyh rayon mahkemesi ukrain faaliyetçisine azatlıqnı sıñırlav tedbirini eki ay ev apisi muddetine deñiştirdi.
Baluhnıñ qorçalavı ve aq-uquq qorçalayıcıları, onıñ Ukraina tarafdarı olğanı sebebinden – eviniñ azbarındaki Ukraina bayrağı olğanı içün repressiyalar qurbanı olğanını sayalar.
