Link açıqlığı

Saatnıñ esas haberi

QMC prokuraturası Qırım Yuqarı Radasınıñ eki sabıq deputatına qarşı qabaatlavnı mahkemege yolladı


QMC prokuraturası Qırım Muhtar Cumhuriyeti Yuqarı Radasınıñ eki sabıq deputatına qarşı qabaatlavnı mahkemege yolladı. Olar devletke hainlik yapqanlarında qabaatlana. Bunı aprel 2-de Qırım.Aqiqatqa QMC prokuraturasınıñ matbuat kâtibi Tatyana Tihonçik bildirdi.

Onıñ aytqanına köre, cinaiy işniñ alıp barılması esnasında, 2014 senesiniñ mart-aprel aylarında Qırım Muhtar Cumhuriyeti Yuqarı Radası deputatlarınıñ Qırımnıñ ilhaqına yardım etkenlerine ve qol tutqanlarına dair red etilemez deliller elde etildi.

Tihonçik: «Ayrıca, olarnıñ vastasız iştiraki ile bir sıra qararlar qabul etildi. Bunıñ neticesinde qanunsız «Qırım Cumhuriyeti» devlet teşekküli meydanğa ketirildi», – dedi.

Onıñ malümatına köre, qabaatlanğanlarğa 12 yıldan 15 yılğa qadar apis muddeti tayin etilmek mumkün.

Qırım. Aqiqatta olğan malümatqa köre, bu yerde sabıq deputatlar Vladimir Osipenko ve Oleg Rusetskiyden baas etile.

Daa evel Qırım Muhtar Cumhuriyeti Prokuraturası, 2017 senesiniñ dekabr ayındaki vaziyetine köre, 75 sabıq Qırım Yuqarı Radası deputatınıñ qıdırılması ilân etildi, dep bildirgen edi.

Qırım ve Aqyar şeeri territoriyasında 2014 senesi martnıñ 16-sında yarımadanıñ statusı boyunca dünya tarafından tanılmağan referendum ötkerildi. Rusiye, onıñ neticesine esaslanıp, Qırımnı öz toprağına qoştı. Ne Ukraina, ne Avropa Birligi, ne de AQŞ referendumdaki rey berüvniñ neticelerini tanımadılar. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.

Halqara teşkilâtları Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalar qullandı. Rusiye, yarımadanı işğal etkenini red etip, oña «tarihiy adaletniñ tiklenmesi», dey.Ukrainanıñ Yuqarı Radası 2014 senesi fevralniñ 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.

XS
SM
MD
LG