Ukraina tış işleri naziri Pavlo Klimkin, Ukrainada kirill elifbesi ile bir arada latin yazısınıñ qabul etilmesi imkânını muzakere etmege davet etti. Bunı o, Facebookta yazıp, bu ğayeni onda Poloniya jurnalisti Zemovit Şçerekniñ teklifi doğurdı, dep bildirdi.
Klimkin: «Zemovit Şçerek, Ukrainağa kirill yazısınen bir arada latin yazısını qabul etmege ne keder ete, dep soradı. Maqsadımız – Ukrainanıñ siyasiy milletini şekillendirmektir. Bu sebepten, bizni ayırmayıp, aksine birleştirgen şeyler içün çalışmaq kerekmiz. Diger taraftan, bu ne içün muzakere etilmesin?» – dep bildirdi.
O, Ukrainanıñ Merkeziy Avropa toplulığındaki rolü aqqında suhbet, bazarertesi künü jurnalistler, yazıcılar ve sabıq siyasetçilerniñ iştiraki ile yapıldı, dep añlattı.
Şimdi slavân devletleri arasında kirill yazısını Ukraina, Beyazrusiye, Rusiye, Makedoniya, Qaradağ, Sırbistan ve Bosna-Hersek qullanalar. Sabıq türkiy sovet cumhuriyetleri arasında yalıñız Qazaqstan ile Qırğızstan kirillitsanı saqlap qaldı. Keçken sene Qazaqstan prezidenti Nursultan Nazarbayev, qazaq tiliniñ 2025 senesine qadar kirill yazısından latin yazısına adım-adım keçirilmesi aqqında fermannı imzaladı.
Qırğızstanda prezident Almazbek Atambayev, latin yazısına keçilmesiniñ imkânına dair şübhe bildirdi. SSCB dağılğan soñ Azerbaycan ve Türkmenistan birden latin yazısına keçtiler. Özbekistan latin ve sovet devriniñ kirill yazılarını parallel şekilde qulllana.
