Ukraina İnformatsion siyaset nazirligi Rusiye tarafından ilhaq etilgen Qırımda qırımtatar faaliyetçisi ve cemiyet jurnalisti Nariman Memedeminovnıñ yaqalanmasını «sert bir şekilde taqbih ete».
Bu hususta Nazirlikniñ mart 25-te derc etilgen beyanatında bildirile.
Beyanatta: «Yarımadanıñ cinayetkâr işğalci «ukümet»i, sahte cinaiy işler açıp ve Kremlniñ kontroli altında olğan «mahkemeler»den qanunsız qararlar keçirip, baiqa fikirde olğanlarğa qarşı repressiyalar qullanmağa devam ete. Maqsatları belli – Qırımnıñ ilhaqına narazılıq köstergen ve vatandaş areketini yapa bilgen insanlarnı qorquzmaqtır», – denile.
Nazirlikte, Memedeminov oğraşqan cemiyet jurnalistikası, «qırımtatar halqınıñ Rusiye işğaline qarşı zorbalıqsız küreşiniñ bir şekli ola», dep qayd ettiler.
Ukrainanıñ İnformatsion siyaset nazirliginde: «Nazirlik, Qırımda insan aqlarınıñ sistematik şekilde bozulğanına dünya toplulığı ve şu cümleden BMT, OBSCE ve Avropa Şurasındaki munasip muessiseleriniñ diqqatını çekip, işğalci devlet tarafından böyle areketlerniñ yapılmasına yol bermemek içün kerekli olğan çarelerni körmege davet ete», – dep ilâve ettiler.
Mart 22-de Rusiye telükesizlik ve uquqqoruyıcı organlarnıñ hadimleri Nariman Memedeminovnıñ Bağçasaraydaki evini tinttiler. Bundan soñ faaliyetçi Aqmescitteki Rusiye FSBsi idaresine sorğulamaq içün alıp ketildi. Mart 23-te mahkeme Memedeminovnı mayıs 16-ğa qadar tevqif etti.
2016 senesiniñ fevralinde Memedeminovnıñ evi endi tintilgen edi. 2017 senesi iyül 13-te Rusiyeniñ kontroli altında olğan Bağçasaray rayon mahkemesi Memedeminovğa qarşı memuriy işni baqqan edi. O, güya 2017 senesi aprel 13-te, o zaman evi tintilmekte olğan Seydamet Mustafayevniñ evi yanında resmiy izin alınmayıp yapılğan mitingde iştirak etkeninde qabaatlandı. O vaqıt, yurtdaşına qol tutmaq içün eviniñ yanında pek çoq qırımtatar toplandı, olarnıñ arasında Nariman Memedeminov da bar edi.
Qırım Rusiye tarafından ilhaq etilgen soñ Rusiye ukümeti mustaqil jurnalistler, cemiyet faaliyetçileri, qırımtatar milliy areketiniñ faaliyetçileri, Qırımtatar Milliy Meclisiniñ azaları ve bunıñ kibi de Rusiyede yasaq etilgen «Hizb ut-Tahrir» teşkilâtı ile alâqalarından dolayı şübheli tanılğan Qırım musulmanlarınıñ evlerinde muntazam surette kütleviy tintüvler yaptıra.
