Rusiye telükesizlik hadimleri ve mahsus hizmetler ilhaq etilgen Qırımda qırımtatarlarnı toqtamayıp taqip ete, narazılıq köstermekniñ er angi ıntılışı ise merametsizce bastırıla.
Bu aqta ConservativeHome saytında derc etilgen Büyük Britaniya parlamentiniñ Lordlar palatasındaki Konservativ fırqasınıñ azası Riçard Springniñ beyanatında bildirile.
Beyanatta: «Qırımtatarlarnı soqaqlarda Rusiye GRU mahsus hizmeti ve «Qırımnıñ özüni mudafaası» denilgen aydutlar taqımınıñ vekilleri gizleden közete. Er angi muhalefet merametsizce bastırıla», – denile.
Ondan ğayrı Spring, qırımtatarlarnı sıq-sıq alıp qaça, eziyetley ve olarğa qarşı uydurma cinaiy işler açalar, dep yaza.
Springniñ beyanatında: «Umumiy bir qorquzuv muitinde evler, camiler ve mekteplerniñ tintüvleri qırımtatarlarnıñ er künlük ayatında alışılğan bir şey oldı. Rusiye prezidentiniñ saylavı arfesinde olarnı rey bermege mecbur etmek içün evlerine kele ediler», – denile.
Bunıñnen birlikte siyasetçi, qırımtatarlar Ukraina-Rusiye çatışmasında biraz unutılğan alda qalmaqtalar, faqat olarnıñ vekilleri, Qırımnıñ ilhaqına kütleviy surette narazılıq köstergenlerge qarşı Rusiye ukümeti tarafından areketler yapılğanı aqqında bildireler, dep qayd etti.
Mart 22-de Rusiye telükesizlik ve uquqqoruyıcı organlarnıñ hadimleri Nariman Memedeminovnıñ Bağçasaraydaki evini tinttiler. Bundan soñ faaliyetçini Aqmescitteki Rusiye FSBsi idaresine sorğulamaq içün alıp kettiler. Mart 23-te mahkeme Memedeminovnı mayıs 16-ğa qadar tevqif etti.
Qırım Rusiye tarafından ilhaq etilgen soñ Rusiye ukümeti mustaqil jurnalistler, cemiyet faaliyetçileri, qırımtatar milliy areketiniñ faaliyetçileri, Qırımtatar Milliy Meclisiniñ azaları ve bunıñ kibi de Rusiyede yasaq etilgen «Hizb ut-Tahrir» teşkilâtı ile alâqalarından dolayı şübheli tanılğan Qırım musulmanlarınıñ evlerinde muntazam surette kütleviy tintüvler yaptıra.
