Cemiyet jurnalisti, qırımtatar faaliyetçisi Nariman Memedeminovnıñ yaqalanuvı ve tevqif etilmesi, ilhaq etilgen Qırımdaki Rusiye ukümetiniñ qırımtatarlarğa qarşı ateketlerini saylama şeklinde yapqanını köstere.
Bunı Ukrainanıñ qıtadaki qısmında bulunğan Qırım musulmanlarınıñ diniy idaresi (QMDİ) muftisi Ayder Rustamov Facebookta yazdı.
«Memedeminovnıñ tintüvi, yaqalanuvı ve Aqmescit şeerindeki «Kyiv rayonı mahkemesi»niñ qararı Qırımdaki işğalci ukümet tarafından yapılğan areketlerniñ aselet qırımtatarlarğa qarşı siyasiy sebepten, saylama şeklinde ve retrospektiv tarzda yapığanlarını nevbetteki kere tasdiqlağanı körünip tura», – yazdı o.
Rustamov, Nariman Memedeminovnıñ tevqifini, Qırımda cemiyet faaliyetçileriniñ işine ve cemiyet jurnalistikasına nevbetteki darbe, dep tüşüne.
Ayder Rustamov: «Nariman bey «Qırım birdemligi»niñ faal iştirakçisi, qırımtatarlarğa qarşı «mahkeme»lerge qatnadı ve yurtdaşlarınıñ evleri tintilgende o yerlerde buluna edi. Daa üç çağına yetmegen bala: eki oğlu (6 ve 3 yaşında) ve 11 yaşlı qızı besleyicisiz qaldılar. Allah Haqtır ve aqiqat er vaqıt yeñer. Bu, yalıñız muddet meselesidir. Küreşimiz devam ete», – dep qayd etti.
Mart 22-de Rusiye telükesizlik ve uquqqoruyıcı organlarnıñ hadimleri Nariman Memedeminovnıñ Bağçasaraydaki evini tinttiler. Bundan soñ faaliyetçini Aqmescitteki Rusiye FSBsi idaresine sorğulamaq içün alıp kettiler. Mart 23-te mahkeme Memedeminovnı mayıs 16-ğa qadar tevqif etti.
2016 senesiniñ fevralinde Memedeminovnıñ evi endi tintilgen edi. 2017 senesi iyül 13-te Rusiyeniñ kontroli altında olğan Bağçasaray rayon mahkemesi Memedeminovğa qarşı memuriy işni baqqan edi. O, güya 2017 senesi aprel 13-te, o zaman evi tintilmekte olğan Seydamet Mustafayevniñ evi yanında resmiy izin alınmayıp yapılğan mitingde iştirak etkeninde qabaatlandı. O vaqıt, yurtdaşına qol tutmaq içün eviniñ yanında pek çoq qırımtatar toplandı, olarnıñ arasında Nariman Memedeminov da bar edi.
Qırım Rusiye tarafından ilhaq etilgen soñ Rusiye ukümeti mustaqil jurnalistler, cemiyet faaliyetçileri, qırımtatar milliy areketiniñ faaliyetçileri, Qırımtatar Milliy Meclisiniñ azaları ve bunıñ kibi de Rusiyede yasaq etilgen «Hizb ut-Tahrir» teşkilâtı ile alâqalarından dolayı şübheli tanılğan Qırım musulmanlarınıñ evlerinde muntazam surette kütleviy tintüvler yaptıra.
