Qırımda yerleştirilgen Rusiye orduları gruppirovkasınıñ terkibi, onıñ ucüm operatsiyalarına doğrultılğanı aqqında söylemege imkân bere, deye tüşüne arbiy tarifleyici Pavel Felgengauer. Bu fikirni o, Qırım.Aqiqat Radiosı yayınında bildirdi.
«Qırımda bugün küçlü bir Rusiye gruppirovkası yerleştirilgen. Şu cümleden zemaneviy T-72B3 tankları (sovet tankınıñ zemaneviy modifiktsiyası) bar. Olarnıñ maqsadı, sail mudafaası olmayıp, Qırımdan ucüm etmek olğanı açıq-aydındır. Aviatsiya ve flot, bir taraftan, Bosforğa yönetilgenler, diger taraftan ise, büyük ihtimal ile, (qıtadaki – QA) Ukrainağa da yönetilmek mumkünler. Strategik olmağan nükleer silanın taşıyıcıları ise Qırımda mevcüt. Demek ki, bunı kimse açıqtan söylemese de, büyük ihtimal ile, böyle arbiy yedekler ile anbarlar da bardır», – dep qayd etti ekspert.
Daa evel Rusiye Qara deñiz flotunıñ komandanı Aleksandr Vitko Rusiye Mudafaa nazirliginiñ «Krasnaya zvezda» gazetası içün bergen intervyüde, Rusiye ilhaq etilgen Qırımda, yarımadanı bütün telükelerden qorçalay bilecek gruppirovkanı meydanğa ketirdi, dep bildirdi. Onıñ malümatına köre, bugün yarımadada «Bal» ve «Bastion» gemilerge qarşı sail raketa kompleksleri, «Triumf» S-400 avadan mudafaa raketa kompleksleri, em de deñiz ava quvetleri ve avadan mudafaanıñ aviatsiyaları yerleştirildi.
2014 senesinde Qırım ilhaq etilgen soñ Rusiye yarımadada muntazam surette arbiy talimlerni ötkere. Ukrainanıñ Baş ştabında, Rusiyeniñ Qırımdaki areketlerine qanunsız deyler.
Ukrainada NATO ofisi mudiriniñ muavini Ann-Kristin Bergene, Qırımnıñ arbiyleştirilmesi ve Qara deñiz bölgesinde Rusiye arbiy bulunuvınıñ kenişlemesi munasebeti ile ciddiy endişe bildirdi.
Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalarnı tatbiq etti. Rusiye, yarımadanı işğal etkenini red etip, buña «tarihiy adaletniñ tiklenüvi», dey. Ukrainanıñ Yuqarı Radası 2014 senesi fevral 20 kününi, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
