Link açıqlığı

Saatnıñ esas haberi

Putinniñ tanılmaması, eki taraflı añlaşmalarnıñ qanuniyligini, qanuniylik noqtai-nazarından şübhe altına qoyalar – Poroşenkonıñ Radadaki vekili


Vladimir Putin (solda), Petro Poroşenko (sağda)
Vladimir Putin (solda), Petro Poroşenko (sağda)

Ukraina prezidentiniñ Yuqarı Radadaki vekili İrina Lutsenko, parlament tarafından Rusiye prezidenti saylavınıñ ihtimal ile tanılmaması, Ukraina ile Rusiye arasında kelecekte yapılacaq eki taraflı añlaşmalarnıñ qanuniyligi içün telüke doğuracaq, dep tüşüne.

Bunı o, mart 19-da jurnalistlerge bildirdi, dep naqil ete «Ukrainskiye novosti».

Haber agentligi, Lutsenkonıñ sözlerini naqil etip: «Büyük munaqaşalar keçti: saylavnı bütün Rusiye territoriyasındamı, yoqsa yalıñız Qırımdamı tanımamalı. Prezident Putin öz devletinde qanunsız olsa, Ukraina içün elverişli olğan ve bizim menfaatımızğa uyğun kelgen bütün añlaşmalar (misal içün, barıştırıcı missiya bizge kelişken şekilde olsa) – Rusiyeniñ qanunsız prezidenti imza aqqına saip olaraq qabul etilmez ve bu añlaşmalarnı qanuniy yapamaz», – dep bildirdi.

Onıñ fikrine köre, bu, Rusiye ile diplomatik munasebetlerniñ üzülmesi ile de alâqalı.

Lutsenkonıñ fikrine köre, munasebetlerniñ üzülmesi aqqında qarar, halqara ortaqlarnen aqıl tanışmalarından soñ qabul etilecek.

Mart 18-de Rusiyede ve onıñ tarafından ilhaq etilgen Qırımda prezident saylavında rey berüv ötkerildi. Resmiy Kyiv ve ondan ğayrı bir sıra halqara teşkilât ve bir çoq dünya devleti yarımadadaki saylavnıñ neticelerini tanımaylar.

Mart 19-da Ukraina prezidenti Petro Poroşenko, Rusiye tarafından ilhaq etilgen Qırımda keçirilgen saylavnıñ neticelerine «sıfır derecesinde» ve «uquqiy neticeleri olmaycaq», dedi.

İlhaq etilgen Qırımda Rusiye prezidenti saylavınıñ tanılmaması aqqında ABniñ tış işleri ve telükesizlik siyaseti boyunca Yüksek temsilcisi Federika Mogerininiñ beyannamesinde bildirile.

Daa evel halq deputatları Maksim Burbak ve Georgiy Logvinskiy parlamentte «Yuqarı Radanıñ, Ukraina tarafından Rusiye prezidenti saylavı, onıñ neticeleri, uquqiy aqibetleri ve, buña munasip şekilde, bu vazifege saylanğan şahısqa ait aktlarnıñ tanılmamasına dair bildirüvi aqqında» qarar leyhasını qayd ettiler.

Ukraina Yuqarı Radası bu aftanıñ soñuna qadar, mart 18-de olıp keçken Rusiye prezidenti saylavınıñ qanuniy tanılması aqqında qarar leyhasını qabul etmek mumkün.

Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalarnı tatbiq etti. Rusiye, yarımadanı işğal etkenini red etip, buña «tarihiy adaletniñ tiklenüvi», dey. Ukrainanıñ Yuqarı Radası 2014 senesi fevral 20 kününi, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.

XS
SM
MD
LG