Kremlniñ kontroli altında olğan yarımadanıñ ukümeti tarafından bildirilgen ilhaq etilgen Qırımdaki Rusiye prezidenti saylavında iştirak seviyesine dair malümat abartıldı. Bunı Ukraina prezidentiniñ qırımtatar halqınıñ işleri boyunca vekili Mustafa Cemilev «Liga.Novosti». neşiri içün bergen intervyüde iddia ete.
Onıñ aytqanına köre, iştirak seviyesine dair malümat azırlanğanda, yarımadada 2014 senesindeki referendumnıñ neticeleri boyunca ilân etilgen raqamlar qullanıldı.
«İlân etilgen saylav bölüklerine kelüv boyunca faizler ile prezident namzetleri içün berilgen seslerniñ faizlerine kelgende ise bu, büyük ihtimal ile, felyetoncılar içün bir mevzu. Bilgenime köre, merkezden, Qırımda saylavcılarnıñ kelmesi ile alâqalı «saylav» neticeleri, olarnıñ 2014 senesinde ötkergen «referendum»ından soñ ilân etilgen raqamlarnen tahminen bir olmaq kerekler, degen talimat keldi. İşte bu sebepten olar, aqiqat ile iç bir alâqası olmağan, tahminen aynı olğan raqamlarnı berdiler», – qayd etti Cemilev.
O, Rusiye, ilhaq etilgen Qırımda saylav teşkil etip, «daa bir kere gizlemeden halqara uquqnı bozdı», dep ilâve etti.
İlhaq etilgen Qırımda şu anda faaliyet köstergen Rusiye prezidenti Vladimir Putin, saylavcılarnıñ 71,6%-i iştirak etken alda reyleriniñ 92%-inden ziyadesini qazandı. Mart 19-da ABniñ tış işleri boyunca matbuat kâtibi Maya Kosyançiç, Avropa Birliginde Rusiye prezidenti saylavını, ilhaq etilgen Qırım ve Aqyarda rey berüvniñ tışında olıp keçken, dep sayğanlarını qayd etti
Mart 19-da Ukraina prezidenti Petro Poroşenko, Rusiye tarafından ilhaq etilgen Qırımda keçirilgen saylavnıñ neticelerine «sıfır derecesinde» ve «uquqiy neticeleri olmaycaq», dedi.
