İlhaq etilgen Qırımda «qırımtatar göñüllüler batalyonı»nda iştirak etekeninde qabaatlanğan 24 yaşlı erkek tevqif etildi. Bunı mart 20-de, uquqqoruyıcı organlardaki menbağa atıf etip, Rusiye ukümetine yaqın olğan «Krıminform» neşiri bildire.
KHV: «Şübheli tevqif etildi. Al-azırda o Qırımda apiste buluna», – dep, adını bildirmegen menbasınıñ sözlerini naqil ete.
Daa evel Qırım KHVleri, Qırımda 24 yaşlı erkekniñ «qırımtatar göñüllüler batalyonı»nda iştirak etekeninde qabaatlanğanını bildirdiler.
Rusiye telükesizlik muessesinde qabaatlanğannıñ adını bildirmeyler. Qırım.Aqiqat adiseniñ tafsilâtlarını ögrene.
Ukraina uquqqoruyıcı organlar strukturasında qırımtatar batalyonınıñ meydanğa ketirilmesi aqqında munaqaşa 2016 senesinden berli devam ete. Qırımtatar Milliy Meclisinde, bu mesele boyunca bütün materiallar Ukraina prezidenti Petro Poroşenko ve İİN başlığı Arsen Avakovğa berildi, dep qayd etken ediler.
Ukraina İçki işler nazirliginiñ (İİN) sistemasına kirgen Ukraina Milliy gvardiyasında, onıñ bir qısmı olaraq «qırımtatar batalyonı»nıñ meydanğa ketirilmesi aqqında sözler şimdilik qanun ile pekitilmeyip, beyanatlar seviyesinde qalmaqtalar, dep qayd ettiler.
«Asker» cemiyet teşkilâtınıñ başlığı Lenur İslâmov meydanğa ketirilecek olğan «qırımtatar batalyonı»na Noman Çelebicihannıñ adı ile arbiy qısım nomerasınıñ berilmesini talap ete edi.
