İlhaq etilgen Qırımda 24 yaşlı erkek «qırımtatar göñülliler batalyonı»nda iştirak etekeninde qabaatlandı.
Bunı mart 20-de Qırım KHVsi, Rusiye FSBsiniñ ihaq etilgen yarımada boyunca idaresine atıfta bulunaraq bildirdi.
Rusiye telükesizlik hadimleri, Qırım sakini, Ukrainanıñ qıtadaki territoriyasına barıp, anda, olar tarafından «Noman Çelebicihan adına qırımtatar göñülliler batalyonı» denilgen «silâlı birlikke aza olıp kirdi», dep iddia eteler.
FSB, Qırım sakini 2017 senesiniñ oktâbrine qadar, güya qomşu Rusiyeniñ topraq bütünliginiñ bozuluvına doğrultılğan «arbiy areketlerde iştirak etti», dep iddia ete.
Rusiye telükesizlik muessisesinde qabaatlanğannıñ adını bildirmeyler. Qırım.Aqiqat adiseniñ tafsilâtlarını ögrene.
Ukraina uquqqoruyıcı organlar strukturasında qırımtatar batalyonınıñ meydanğa ketirilmesi aqqında munaqaşa 2016 senesinden berli devam ete. Qırımtatar Milliy Meclisinde, bu mesele boyunca bütün materiallar Ukraina prezidenti Petro Poroşenko ve İİN başlığı Arsen Avakovğa berildi, dep qayd etken ediler.
Ukraina İçki işler nazirliginiñ (İİN) sistemasına kirgen Ukraina Milliy gvardiyasında, onıñ bir qısmı olaraq «qırımtatar batalyonı»nıñ meydanğa ketirilmesi aqqında sözler şimdilik qanun ile pekitilmeyip, beyanatlar seviyesinde qalmaqtalar, dep qayd ettiler.
«Asker» cemiyet teşkilâtınıñ başlığı Lenur İslâmov meydanğa ketirilecek olğan «qırımtatar batalyonı»na Noman Çelebicihannıñ adı ile arbiy qısım nomerasınıñ berilmesini talap ete edi.
