Ukrainanıñ Almaniyadaki elçisi Andrey Melnik, Almaniyanıñ federal ukümetini, alman siyasetçilerine ilhaq etilgen Qırımğa barmaqnı yasaq etmege davet etti. Bunı o, mart 18-de Twitterde yazdı.
Diplomat: «Nevbetteki alman maceracısı Ulrih Eyme qanunsız olaraq işğal etilgen Qırımğa gizliden kirdi: Federal ukümetni Almaniya vatandaşlarınıñ bunıñ kibi voyajlarını niayet yasaq etmege, Bundenstagdaki «Almaniya içün alternativa» fraktsiyasınıñ rehberlerini ise, fırqanıñ imidjine zarar ketirgen cinaiy areketleri ile alâqalarını üzmege davet etemiz», – dep yazdı.
Ulrih Eyme ve «Almaniya içün alternativa» fırqası tarafından bu hususta açıq menbalarda izaatlar berilmedi.
Fevral ayında «Almaniya içün alternativa» fırqası deputatlarınıñ Qırımğa soñki ziyaretleri esnasında Almaniya Federativ Cumhuriyetiniñ ukümeti olarnı tenqit etti.
Mart 18-de Rusiyede ve onıñ tarafından ilhaq etilgen Qırımda prezident saylavında rey berüv ötkerildi. Resmiy Kyiv ve ondan ğayrı bir sıra halqara teşkilât ve bir çoq dünya devleti yarımadadaki saylavnıñ neticelerini tanımaylar.
İlhaq etilgen Qırımda Rusiye saylavınıñ ötkerilmesi arfesinde Almaniya Tış işleri nazirligi, «Qırım Ukrainağa ait», dep beyan etti.
OSCE yanındaki Demokratik muessiseler ve insan aqları boyunca bürosınıñ közeticeleri, ilhaq etilgen Qırımdaki saylav bölüklerinde bulunmaycaqlarını bildirdiler.
Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalarnı tatbiq etti. Rusiye, yarımadanı işğal etkenini red etip, buña «tarihiy adaletniñ tiklenüvi», dey. Ukrainanıñ Yuqarı Radası 2014 senesi fevral 20 kününi, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
