Qırımtatar Milliy Meclisiniñ reisi Refat Çubarov Qırım sakinlerine, ilhaq etilgen Qırımda Rusiye prezidenti saylavına boykot etkenleri içün minnetdarlıq bildirdi ve bu adamlarnıñ cesaretinden ğurur duyğanını bildirdi.
Mart 19-da Refat Çubarovnıñ Facebooktaki saifesinde derc etilgen bildirüvde: «Er biriñizniñ – yüz biñlerce qırımtatarlar, ukrainler ve Qırımda yaşağan diger milletlerge ait adamlarnıñ cesürliginden ayretlenem. Siz, Rusiyeniñ işğalci ukümeti tarafından vaqtınca işğal etilgen territoriyada teşkil etilgen qanunsız saylavınıñ açıqtan ilân etilgen boykotıñız ile bütün dünyağa menligiñizniñ olğanını ve öz ülkeñiz – Ukrainağa sadaqatıñıznı numayış ettiñiz. Rusiyeniñ işğali şaraitinde köstergen vatandaş cesaretiñiz ve qatiyligiñiz pek çoq ukümet tarafından añıla, siyasetçilerge Qırımda Ukrainanıñ devlet suverenitetini ğayrıdan tiklemek içün areket etmege yürek bere», – denile.
O, Qırımtatar Milliy Meclisi, «Qırımda Rusiye işğalcileri tarafından teşkil etilgen qanunsız 2018 senesi mart 18 saylavında qırımtatarlarnıñ kütleviy surette iştirak etmegenini minnetdarlıq ile qayd ete», dep bildirdi.
Refat Çubarov: «Qırımtatar Milliy Meclisi adından Qırımda yaşağan ve Rusiye işğalcilerine, olarnıñ tarafından yapılğan cinaiy areketlerge özlerini celp etmege bermegen yüz biñlerce Ukraina vatandaşlarına minnetdarlıq bildirem. Qırım Rusiye işğalcilerinden azat etilecek! Qırımğa, mustaqil Ukraina devleti içinde qırımtatar muhtariyeti statusı berilecek», – dep yazdı.
Mart 19-da Qırımtatar Milliy Meclisiniñ reisi Refat Çubarov, yarımadada qırımtatarlarnıñ 90%-inden ziyadesi Rusiye prezidenti saylavını «tamamen boykot etti», dep bildirdi.
Daa evel ilhaq etilgen Qırımda Rusiye prezidenti saylavında protokollarnıñ 100%-i işlep çıqıldı. Şu anda faaliyet köstergen Rusiye prezidenti Vladimir Putin, saylavcılarnıñ 71,6%-i iştirak etmekle reyleriniñ 92%-inden ziyadesini qazandı.
Mart 18-de Rusiyede ve onıñ tarafından ilhaq etilgen Qırımda prezident saylavında rey berüv ötkerildi. Resmiy Kyiv ve ondan ğayrı bir sıra halqara teşkilât ve bir çoq dünya devleti yarımadadaki saylavnıñ neticelerini tanımaylar.
Mart 19-da Ukraina prezidenti Petro Poroşenko, Rusiye tarafından ilhaq etilgen Qırımda keçirilgen saylavnıñ neticelerine «sıfır derecesinde» ve «uquqiy neticeleri olmaycaq», dedi.
İlhaq etilgen Qırımda Rusiye prezidenti saylavınıñ tanılmaması aqqında ABniñ tış işleri ve telükesizlik siyaseti boyunca Yüksek temsilcisi Federika Mogerininiñ beyannamesinde bildirile.
OSCE yanındaki Demokratik muessiseler ve insan aqları boyunca bürosınıñ közeticeleri, ilhaq etilgen Qırımdaki saylav bölüklerinde bulunmaycaqlarını bildirdiler.
