Kanada Tış işleri nazirliginiñ başlığı Hristâ Friland, Ottava Qırımnıñ Rusiye tarafından ilhaqını ve, ondan ğayrı, yarımadada Qırımtatar Milliy Meclisine qarşı zulumnı taqbih ete, dep bildirdi. Bunı o, özüniñ Twitterdeki saifesinde yazdı.
Bildirüvde: «Kanada, qırımtatarlarnıñ öz-özüni idare etüv organı olğan Meclisniñ yasaq etilmesini taqbih etmege devam etip, Qırımda bütün azlıqlarnıñ aqlarını qorçalamağa davet ete», – denile.
Friland, qırımtatarlar «Qırımnıñ Rusiye tarafından yapılğan qanunsız ilhaqı esnasında pek büyük azap çeke», deye ilâve etti.
Daa evel Poloniya Tış işleri nazirligi Rusiyeni, Qırım ilhaqını toqtatmağa davet etti ve, Moskva halqara uquqqa riayet etmege başlamağance, onı sanktsiyalar «taqip etecek», dep saqındırdı.
2017 senesiniñ aprelinde BMTniñ Halqara mahkemesi, Ukrainanıñ, ilhaq etilgen Qırım boyunca muvaqqat tedbirlerniñ alınması aqqında muracaatına dair musbet qarar aldı. Rusiyeni, cümleden, Qırımda Qırımtatar Milliy Meclisiniñ yasaq etilmesini lâğu etmege ve ukrain tilinde tasilniñ alınmasına izin bermege mecbur ettiler. Lâkin Qırımnıñ Rusiye akimiyeti bu talaplarnı yerine ketirmek mecburiyetini red etti.
Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalarnı tatbiq etti. Rusiye, yarımadanı işğal etkenini red etip, buña «tarihiy adaletniñ tiklenüvi», dey. Ukrainanıñ Yuqarı Radası 2014 senesi fevral 20 kününi, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
